Эканоміка

Некаторыя мадэлі падаражэлі на 95%. Што з цэнамі на аўто і тэхніку?

У Беларусі працягваюць расьці цэны літаральна на ўсё. Глядзім, як даражэюць машыны і тэхніка.

Бытавая і іншая тэхніка

  • За паўгода ў Беларусі лядоўні падаражэлі на 33,63%. У студзені, паводле Белстату, лядоўня каштавала 1137,61 рубля, а ў чэрвені ўжо 1520,17 рубля. На траціну за гэты час падаражэлі пральныя машыны, прасы вырасьлі ў цане на 15%, на 18% падаражэлі мікрахвалёўкі.
  • Пасудамыйкі за паўгода вырасьлі ў кошце на 31%, кухонныя камбайны — на 13%.
  • Смартфоны імкліва пачалі даражэць пасьля пачатку вайны, але потым рост крыху спыніўся. За паўгода цэны на мабільныя прылады падняліся на траціну. Ноўтбукі вырасьлі ў цане на 9,5%, лічбавыя камэры падаражэлі на 34%, тэлевізары сталі каштаваць больш на 7%.
ГЛЯДЗІЦЕ ТАКСАМА: «Нідзе не знайсьці цукру». Ці пагражае Беларусі дэфіцыт салодкага? Разьбіраемся

Аўтамабілі

Калі цэны на прадукты, бытавую тэхніку і паслугі, паводле Белстату, збольшага адпавядаюць рэальнаму стану рынку, то з аўтамабілямі — пытаньне. Згодна зь Белстатам, за паўгода ў сярэднім аўтамабілі падаражэлі толькі на 27,33%.

Паводле статыстычнага ведамства, набыць аўтамабіль у чэрвені можна было за 61 738 тысяч рублёў, або 24 116 даляраў. Глядзім, ці рэальна набыць аўтамабіль за такія грошы.

Самы танны варыянт з новых, які знаходзім, — гэта Kio Ria 2021 году зборкі ў пачатковай камплектацыі ад 48 тысяч рублёў.

Гэта нават таньней, чым дае Белстат. Аднак усе іншыя новыя машыны даражэйшыя. Красовэр Nisan Terrano — 63 300 рублёў, бездарожнікGeely Atlas Pro — 87 400 рублёў і вышэй.

ГЛЯДЗІЦЕ ТАКСАМА: Завод перажыў дзьве вайны, але збанкрутаваў пры Лукашэнку. Што адбываецца зь беларускімі прадпрыемствамі

Магчыма, статыстыкі зь Белстату бралі пад увагу і ўжываныя аўтамабілі — яны каштуюць ад 9 тысяч рублёў, калі разглядаць машыну 2000 году зь вялікім прабегам.

Паводле парталу av.by, які спэцыялізуецца на аўтамабільнай тэматыцы, вытворцы павышалі адгрузачныя цэы для Беларусі, пачынаючы з сакавіка, ад 40% да 70%. Гэта яўна не 27%, пра якія піша Белстат.

Сумарнае павелічэньне для беларускіх дылераў на некаторыя мадэлі даходзіла да 95%. Паводле Беларускай аўтамабільнай асацыяцыі, у чэрвені ў Беларусі прадалі 1113 легкавых аўтамабіляў. Гэта ў 2,4 раза менш, чым у чэрвені мінулага году.

ГЛЯДЗІЦЕ ТАКСАМА: Зьмяніліся правілы продажу патрыманых аўтамабіляў

Асноўны фактар, які паўплываў на лічбы продажу, — дэфіцыт прапановы, паведамляюць у асацыяцыі.

Асноўны лідэр продажаў, паводле статыстыкі асацыяцыі, — Geely. А дзясятка самых папулярных легкавых аўтамабіляў у чэрвені выглядала так:

  1. Geely Atlas Pro
  2. Geely Coolray
  3. Kia Rio
  4. Volkswagen Polo Liftback
  5. Renault Logan Stepway
  6. Kia Seltos
  7. LADA Vesta
  8. LADA Largus
  9. LADA Niva Legend
  10. Hyundai Santa Fe