«Галоўны доктар і прафэсар абмяркоўвалі выхад на Нобэля за перамогу над ковідам». Падкаст доктара Мартава «На вайне з COVID-19». 4-ы эпізод

Доктар-рэаніматоляг Уладзімер Мартаў шмат гадоў быў загадчыкам аддзяленьня анэстэзіялёгіі і рэанімацыі Віцебскай лякарні хуткай дапамогі, ён адным зь першых у Беларусі адкрыта расказаў пра рэальную сытуацыю з каранавірусам. Вясной 2021 году з доктарам не працягнулі кантракту, бо ён адкрыта гаварыў аб праблемах у мэдыцыне і ў краіне. У лютым 2022 году Мартава арыштавалі на 7 дзён за бел-чырвона-белы сьцяжок на аватарцы ў Facebook.

Прапануем чацьвёрты эпізод другога сэзону падкасту Ўладзімера Мартава «На вайне з COVID-19».

Некалькі фрагмэнтаў

Галоўнае адкрыцьцё другой хвалі — неінвазіўная вэнтыляцыя лёгкіх праз спэцыяльныя шчыльна прылеглыя да твару маскі. Мы адкрылі гэтую мэтодыку для цяжкай дыхальнай недастатковасьці пры ковідзе самі, хоць гэта даўно вядомы мэтад рэсьпіраторнай падтрымкі.

Разам з прыходам новага галоўнага доктара ў маё аддзяленьне рэанімацыі прыйшлі «новыя ідэі». Наогул, пандэмія і зьвязаная з ёй паніка — выдатны час для вар’яцкіх ідэй, для рознага роду шарлятанаў і авантурыстаў.

Я быў сьведкам тэлефоннай размовы, у якой галоўны доктар і прафэсар абмяркоўвалі выхад на Нобэлеўскую прэмію за перамогу над ковідам. Ідэя была простая: прызначаць высокія дозы глюкакартыкоідаў у якасьці супрацьзапаленчых сродкаў.

Неўзабаве ўзьнікла яшчэ адна «новая ідэя»: ужываньне сылдэнафілу ў рэктальных сьвечках для лячэньня каранавірусу (сылдэнафіл больш вядомы пад гандлёвай назвай Віягра). Ізноў яна была высмактаная з пальца. Мы спрачаліся з адміністрацыяй, але сілы былі няроўныя. Ад віягры ў рэктальных сьвечках мы адбіліся, а ад звышвысокіх дозаў глюкакартыкоідаў — не.

«Галоўны доктар і прафэсар абмяркоўвалі выхад на Нобэля за перамогу над ковідам». Падкаст доктара Мартава «На вайне з COVID-19». 4-ы эпізод

У пятым эпізодзе другога сэзону падкасту доктара Мартава «На вайне з COVID-19», які выйдзе 14 ліпеня, вы пачуеце:

• У шпіталь хуткай дапамогі адна за другой прыходзяць камісіі Міністэрства аховы здароўя
• Як лячыць каранавірус — паводле пратаколаў ці ўсё ж рэкамэндацый?
• Галоўны доктар пачынае эканоміць кісларод для хворых.
• У шпіталь трапляюць пацыенты зь Міністэрства ўнутраных справаў, якія спрабуюць утаіць месца працы.
• Доктар Мартаў супраць грамадзянскай вайны ў сваім аддзяленьні.
• Мэдыкі застаюцца ў прафэсійных рамках, сілавікі — не.
• Нормай становіцца лжэсьведчаньне і гвалт.