Чытачы Свабоды зьняпраўдзілі гэтую інфармацыю.
«Так, расейцы едуць цяпер з Украіны „загружанымі“, шмат вязуць нарабаванага. Па горадзе яны сёе-тое прадаюць, але рынку няма», — расказаў жыхар Нароўлі.
«Гандаль зь іх боку пачаўся яшчэ да таго, як яны ўехалі ва Ўкраіну. Расейцы прадавалі мясцовым сокі, кансэрвы. Калі цяпер яны вяртаюцца з Украіны, то вязуць шмат мяшкоў, клункаў. Што там, ня ведаю. Актыўна прадавалі ўкраінскі цукар. Мяшок — 65 рублёў, гэта за 50 кіляграмаў. Прадавалі яго каля шынамантажу на вуліцы Менскай. Некаторыя людзі бралі», — расказала крыніца Свабоды.
Жыхар Нароўлі не выключае, што нарабаваным дабром расейцы гандлююць па хатах ці стыхійна — на ўезьдзе ў Нароўлю з боку Ўкраіны.
ГЛЯДЗІЦЕ ТАКСАМА: «П’юць, прадаюць мясцовым нарабаванае ва Ўкраіне». Што апавядаюць пра расейскіх вайскоўцаў на Гомельшчыне«Бачыў, што расейцы цягнулі садовую тачку, дываны цягнулі. На продаж ці сабе, ня ведаю. Яшчэ яны па цэнтры гораду ганялі на скутэрах і роварах. Дзе іх узялі — пытаньне», — кажа мясцовы жыхар.
Ён дадае, што цяпер расейцы шмат скупляюць прадуктаў у крамах Нароўлі.
«Бяруць цыгарэты, энэргетычныя напоі, майткі, шкарпэткі — усё грабуць. У размовы не ўступаюць. Іхная тэхніка стаіць на нашай аўтабазе, акурат насупраць палявога шпіталя. Казалі, што паедуць адсюль яшчэ 29 сакавіка. Потым нешта зьмянілася, цяпер кажуць, што 7 красавіка выедуць з Нароўлі», — зазначыла крыніца Свабоды.
Нароўля. Расейская вайсковая тэхніка — на тэрыторыі дзейнай аўтабазы, насупраць расейскага палявога шпіталя
Губляюць мабільныя тэлефоны і расейскія карткі, хочуць пазнаёміцца зь дзяўчатамі
Жыхары Мазыра кажуць, што расейцаў у горадзе не паменела. «Яны, як і раней, паўсюль — у барах, крамах, лазьнях», — кажа мясцовы жыхар.
У розных суполках «УКантакце» Нароўлі і Мазыра прысутнасьць расейскіх вайскоўцаў ня надта адчуваецца. У суполцы «Куплю Продам Наровля» былі разьмешчаны абвесткі пра продаж iPad за 150 рублёў і новага мабільнага тэлефона, пра цану якога не паведамляецца. Адзін з прадаўцоў — нібыта «жыхар гораду Энэргадару», у другога профіль прыватны, але на аватарцы — вайскоўцы і танкі.
У мазырскіх пабліках ёсьць абвесткі пра знаходку мабільнага тэлефона, у футарале якога ляжаў сэртыфікат аб вакцынацыі ад каранавірусу. Сэртыфікат быў зроблены мэдпунктам вайсковай часткі 45123 Міністэрства абароны РФ. Частка разьмешчана ў горадзе Каменск-Уральскі Сьвярдлоўскай вобласьці. Гэта авіябаза вайсковай авіяцыі.
З аэрадрому каля вёскі Бокаў Мазырскага раёну мясцовыя шматкроць заўважалі вылеты верталётаў у бок Украіны.
У мазырскіх суполках «УКантакце» таксама ёсьць абвестка пра знойдзеную расейскую банкаўскую картку сыстэмы «Мир».
Таксама ад імя жыхара Расеі была разьмешчана абвестка пра жаданьне пазнаёміцца зь «цікавай дзяўчынай з формамі».
У Гомлі цяпер таксама шмат расейскай тэхнікі і вайскоўцаў. У нядзелю 3 красавіка калёна з танкаў і БТР прайшла па Рэчыцкай шашы. Калёну з вайсковай тэхнікі ў 80 адзінак фіксавалі жыхары Бярозак каля Гомля.
«Калёна ішла ў бок Добрушу. Відавочна, на мяжу з Расеяй», — расказалі мясцовыя.
На станцыі «Навабеліцкая» заўважылі пагрузку вайсковай тэхнікі на плятформы.
«Вайсковая тэхніка стаяла ля гандлёвага цэнтру „Мандарын“.
Расейскіх вайскоўцаў мы бачылі ў гандлёвым цэнтры „Галерэя“ на Катуніна. У краме „Testosterone“ яны куплялі вайсковую форму і берцы. Менавіта гэтыя былі буратамі», — расказаў жыхар Гомля.
Расейская вайсковая тэхніка на чыгунцы ў Гомлі
ГЛЯДЗІЦЕ ТАКСАМА: Расейскія салдаты, якіх вінавацяць у злачынствах у Бучы, трапілі ва Ўкраіну з тэрыторыі БеларусіВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.