Марыя Тарасенка мае цяжкае захворваньне, за год мела дзьве складаныя апэрацыі. Яна пад падпіскай аб нявыезьдзе, на суд праходзіла з дому. 18 кастрычніка ў судзе прагучыць апошняе слова абвінавачаных. Магчыма, што ў гэты ж дзень можа быць вынесены прысуд.
ГЛЯДЗІЦЕ ТАКСАМА: Суд супраць праваабаронцы Леаніда Судаленкі і ягоных памочніц зрабілі закрытымАд 3 верасьня ў судзе Цэнтральнага раёну Гомля ў закрытым рэжыме ідзе працэс над праваабаронцам «Вясны» Леанідам Судаленкам, а таксама валянтэркамі Тацянай Ласіцай і Марыяй Тарасенкай.
Усіх вінавацяць у арганізацыі і падрыхтоўцы дзеяньняў, што груба парушаюць грамадзкі парадак (ч. 1 арт. 342 КК), і ў навучаньні і падрыхтоўцы асобаў для ўдзелу ў такіх дзеяньнях, а таксама іх фінансаваньні або іншым матэрыяльным забесьпячэньні (ч. 2 арт. 342 КК).
Справу разглядае судзьдзя Сяргей Салоўскі, дзяржаўнае абвінавачаньне падтрымліваюць Яўген Фартушняк і Кірыл Вышнякоў.
Леанід Судаленка з-за кратаў раней расказаў цэнтру «Вясна», што адбываецца на закрытым судзе, калі будзе вынесены прысуд і чаму яны з Тацянай Ласіцай ня сталі пісаць прашэньняў аб памілаваньні.
У першы дзень паседжаньня высьветлілася, што ў справе 80 тамоў. Адна з прычын, дзеля якіх суд зрабілі закрытым, — нібыта «бясьпека сьведак». Усяго дапыталі каля 200 чалавек, зь іх прыкладна 61 — непасрэдна ў судзе, пераважна гэта былі тыя, хто зьвяртаўся па прававую дапамогу.
«Усе сьведкі ў судзе сказалі праўду, і гэта галоўнае. Прыемна чуць, як людзі, якія прыходзяць у суд па позвах, кажуць „дзякуй“, зьвяртаючыся да мяне ў клетку. І гэта нягледзячы на заўвагі суду», — напісаў у лісьце Леанід Судаленка.
Праваабаронца мае намер адстойваць сваю невінаватасьць усімі даступнымі яму сродкамі. Таксама ён расказаў пра судовы графік і свае прагнозы на будучыню.
«Крымінальнымі злачынцамі мяне і дзяўчат суд назаве бліжэй да сярэдзіны кастрычніка і накіруе нас з Тацянай на перавыхаваньне ў лягеры. Для Марыі, лічу, будзе пакараньне, не зьвязанае з пазбаўленьнем волі. У мяне і Тані амаль 9 месяцаў зьняволеньня, а па новых правілах заліку тэрміну ў СІЗА — адзін дзень за паўтара. Гэта ўжо мінус год з тэрміну. У самым горшым выпадку ў нас 3 гады максымальна».
Паводле Леаніда Судаленкі, і яму, і Тацяне Ласіцы прыходзілі лісты з прапановай аб памілаваньні. Але гэта не варыянт, кажа ён, бо трэба прызнаць віну. Іншымі словамі, сказаць, што 20 гадоў «зьдзяйсьняў злачынствы», займаючыся праваабарончай дзейнасьцю.
Леанід Судаленка пад вартай у СІЗА ад 18 студзеня. На тры дні пазьней туды трапіла Тацяна Ласіца. У дачыненьні да Марыі Тарасенкі выбралі меру стрыманьня ў выглядзе абавязаньня аб яўцы і падпіскі аб нявыезьдзе.
ГЛЯДЗІЦЕ ТАКСАМА: Зьняволены праваабаронца Судаленка: «Сьведкі кажуць „дзякуй“, зьвяртаючыся да мяне ў клетку»Як удакладніў у лісьце Леанід Судаленка, канкрэтна яму ў віну ставяць наступныя эпізоды:
- Забесьпячэньне дровамі шматдзетнай сям’і, бацьку якой асудзілі за «беспарадкі».
- Відэа на YouTube-канале «Рудабельская паказуха», дзе праваабаронца тлумачыць блогеру Андрэю Павуку, што такое пратэст.
- Заклік у сацсетках сустрэць з ІЧУ жыхарку Гомля Марыю Тульжанкову пасьля 15 сутак арышту.
- Сэмінар аб лічбавай бясьпецы для праваабаронцаў.
- Аплата штрафаў і збораў за звароты ў суд і дапамогу адвакатаў.
Перасьлед Праваабарончага цэнтру «Вясна»
Па стане на 3 сакавіка 2024 году, за кратамі знаходзяцца 5 праваабаронцаў «Вясны».
- Алесь Бяляцкі, старшыня «Вясны», затрыманы 14 ліпеня 2021. Падчас ягонага зьняволеньня, 7 кастрычініка 2022 году, Алесю Бяляцкаму была прысуджаная Нобэлеўская прэмія міру. 3 сакавіка 2023 году яго асудзілі на 10 гадоў калёніі. Бяляцкага прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Валянцін Стэфановіч, намесьнік старшыні «Вясны» і віцэ-прэзыдэнт FIDH, затрыманы 14 ліпеня 2021-га. 3 сакавіка 2023 году яго асудзілі на 9 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Уладзімер Лабковіч, юрыст «Вясны», затрыманы 14 ліпеня 2021 г. 3 сакавіка 2023 году яго асудзілі на 7 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Марфа Рабкова, праваабаронца «Вясны», затрыманая 17 верасьня 2020 году. Ёй прысудзілі 15 гадоў калёніі ва ўмовах агульнага рэжыму і штраф у памеры 700 базавых велічыняў (22 400 беларускіх рублёў, або звыш 8800 даляраў) паводле ч. 3 арт. 293 Крымінальнага кодэксу («навучаньне ці іншая падрыхтоўка асобаў для ўдзелу ў масавых беспарадках, альбо фінансаваньне такой дзейнасьці»), ч. 3 арт. 130 («распальваньне сацыяльнай варожасьці да ўлады») і ч. 2 арт. 285 КК («ўдзел у злачыннай арганізацыі»). 28 лютага 2023 году Вярхоўны суд Беларусі разгледзеў апэляцыйную скаргу ў справе Рабковай. Тэрмін зьняволеньня скарацілі на тры месяцы.
- Андрэй Чапюк, валянтэр «Вясны» зь Менску, затрыманы 2 кастрычніка 2020-га. Яго абвінавачвацілі ва ўдзеле ў масавых беспарадках і ўдзеле ў злачыннай арганізацыі. Чапюка асудзілі на 6 гадоў калёніі ва ўмовах узмоцненага рэжыму і пакаралі штрафам у памеры 500 базавых велічыняў (16 000 беларускіх рублёў ці больш за 6 300 даляраў);
Выйшлі на волю:
- Тацьцяна Ласіца, валянтэрка «Вясны» з Гомля, затрыманая 21 студзеня 2021. Паводле артыкулу аб масавых беспарадках за кратамі прабыла 1 год і 8 месяцаў. Праваабаронца не адбыла ўвесь тэрмін.
- Леанід Судаленка, дырэктар гомельскага аддзяленьня «Вясны», затрыманы 18 студзеня 2021-га. Паводле артыкулу аб масавых беспарадках яго пакаралі на 3 гады зьняволеньня. Выйшаў на волю. адбыўшы ўвесь тэрмін.