У Ленінскім раённым судзе Берасьця праходзіць суд над чарговай часткай абвінавачаных ва ўдзеле летась 13 верасьня ў карагодзе на скрыжаваньні бульвару Касманаўтаў і праспэкту Машэрава.
Праваабарончы цэнтар «Вясна» паведамляе, што гэтым разам справу разглядае судзьдзя Куроўскі. Бок дзяржаўнага абвінавачаньня прадстаўляюць пракуроры Аляксандар Бацюшка і Міхаіл Юшчук.
На лаве падсудных 12 чалавек:
- Кацярына Бровач
- Арцём Ласкі
- Глеб Нікановіч,
- пэнсіянэр Віктар Атрошка,
- Тацяна Рагачоўская,
- Юры Сацюк,
- Ігар Сямыкін,
- Арцём Тарасюк
А таксама чацьвёра фігурантаў, якія знаходзяцца пад вартай:
- Ільля Ягораў,
- Аляксандар Жук
- Сяргей Канановіч
- тэлевядоўца «Беларусь-4» Канстанцін Сьвідуновіч.
У чым вінавацяць падсудных?
Згодна з вэрсіяй абвінавачаньня, падсудныя ў групе зь іншымі асобамі наўмысна «ўзялі актыўны ўдзел у групавых дзеяньнях, якія груба парушаюць грамадзкі парадак».
Іх дзеяньні нібыта былі спалучаныя зь непадпарадкаваньнем законным патрабаваньням прадстаўнікоў улады, пацягнулі за сабой парушэньне працы транспарту, арганізацыяў і прадпрыемстваў. З прычыны прастою тралейбуснаму парку нанесеная шкода ў суме 619 рублёў 55 капеек, аўтобуснаму — 40 рублёў 37 капеек, на некалькі гадзін закрыліся гандлёвыя павільёны і рэстаран хуткага харчаваньня.
На гэты момант вынесьлі ўжо шэсьць калектыўных прысудаў. Агулам асудзілі 69 асобаў.
ГЛЯДЗІЦЕ ТАКСАМА: Да 2,5 года ў калёніі. У Берасьці асудзілі яшчэ 12 чалавек у «карагоднай справе»Першае судовае пасяджэньне над шостай групай абвінавачаных мелася адбыцца 23 ліпеня. Аднак працэс не пачаўся, бо ў адной з абвінавачаных выявіўся станоўчы тэст на каранавірус. У выніку суд перанесьлі на 9 жніўня.
У дні з 9 па 12 жніўня дапыталі ўсіх абвінавачаных, сьведак, таксама ўжо азнаёміліся з матэрыяламі справы. Працяг суду заплянаваны на 23 жніўня ў 10.00, у той дзень маюць адбыцца спрэчкі бакоў.
ГЛЯДЗІЦЕ ТАКСАМА: «Плыў з самамі і бабром». Студэнт, асуджаны за «карагодную справу», пераплыў Буг і ўцёк у ПольшчуАдначасова разглядаецца справа па ч.2 арт.339 КК «Хуліганства» у дачыненьні да Ігара Вінакурава (ужо асуджаны ў «карагоднай справе» у 5-й частцы фігурантаў), Ільлі Ягорава (цяпер судзяць у «карагоднай справе») і Данііла Дзітоўскага. Іх абвінавачваюць у пашкоджаньні камэр «Белтэлекаму», пры гэтым сума ў 171 рублёў 60 капеек ужо кампэнсаваная дзяўчынай Ягорава (пра што тая заявіла на судзе, маецца чэк).
ГЛЯДЗІЦЕ ТАКСАМА: У Берасьці асуджаную ў «карагоднай справе» перасьледуюць за абразу Лукашэнкі ГЛЯДЗІЦЕ ТАКСАМА: «Такія працэсы трэба праводзіць на стадыёне». У Берасьцi cудзяць яшчэ 12 фігурантаў «карагоднай справы»