Таксама рух «Разам» заявіў на прэс-канфэрэнцыі аб спробе прадстаўнікоў прарасейскіх сілаў ва Ўкраіне дыскрэдытаваць гэтую арганізацыю, а таксама аб правакаваньні канфліктаў з боку «Беларускага дому ва Ўкраіне».
«Забойства Віталя Шышова — палітычнае, яно ёсьць часткаю гібрыднай вайны, накіраванай і супраць Беларусі, і супраць Украіны. І ўкраінскай ўладзе абсалютна неабходна на фоне гэтай трагедыі распрацаваць стратэгію адносна Беларусі», — заявіў сустаршыня арганізацыі Вячаслаў Сіўчык 5 жніўня на прэсавай канфэрэнцыі ў Кіеве.
ГЛЯДЗІЦЕ ТАКСАМА: Школа КДБ, РНЕ, «Азоў». Хто такі Сяргей Кароткіх, які дапамагаў нябожчыку Віталю Шышову зь «Беларускага дому ва Ўкраіне»Яшчэ адна сустаршыня руху Алена Талстая дадала, што Віталь Шышоў займаўся арганізацыяй акцыяў, удзельнічаў у іх, але ніколі публічна не выступаў з палітычнымі заявамі.
«Нашаю мэтаю было наколькі мага бесканфліктнае правядзеньне супольных акцыяў. Мы ня ведалі, што Віталь ёсьць кіраўніком „Беларускага дому“, ставіліся да яго як да беларуса, які дапамагае арганізоўваць акцыі. У іх маглі ўдзельнічаць усе, хто хацеў, ніякіх канфліктаў не ўзьнікала. Чаму на Віталю была зарэгістраваная арганізацыя? Мяркую, гэта таксама не сакрэт — ім патрэбны быў беларус», — патлумачыла яна.
ГЛЯДЗІЦЕ ТАКСАМА: Дзяржаўны дэпартамэнт пільна сочыць за расьсьледаваньнем сьмерці Віталя ШышоваПаводле Алены Талстой, прадстаўнікі руху «Нацыянальны корпус» Сяргей Кароткіх і Радзівон Батулін, у сутнасьці, рэйдэрскім чынам захапілі грамадзкую ініцыятыву «Беларускі дом ва Ўкраіне», якую стварылі першай таму, што большасьць беларусаў-уцекачоў не хацелі далучацца да палітычных арганізацыяў. Але ўвесь час удавалася ўнікаць канфліктаў, бо галоўная мэта была выказаць падтрымку і салідарнасьць Беларусі і беларусам.
«У чэрвені прадстаўнікі „Нацыянальнага корпусу“ прыйшлі на акцыю памяці па Вітольду Ашурку і спрабавалі ізаляваць беларусаў ад падтрымкі ўкраінскіх партыяў, рухаў і грамадзтва. Для нас вельмі важна было, каб усе акцыі былі супольнымі з усімі, апроч прарасейскіх, партыямі і рухамі, каб было разуменьне, што ў нас агульны вораг і агульныя мэтады барацьбы. Гэта была першая спроба адсекчы ад беларусаў нацыянальна арыентаваныя ўкраінскія сілы. Гэта было вельмі нечакана», — паведаміла Алена Талстая.
ГЛЯДЗІЦЕ ТАКСАМА: «Правасудзьдзе павінна адбыцца», — кіраўнік дыпляматыі ЭЗ пра справу ШышоваУ далейшым, паводле яе, прадстаўнікі Беларускага дому ва Ўкраіне пачалі канфрантацыю, забараняючы сваім прадстаўнікам удзел у «чужых» акцыях. Так, гэта адбылося ў часе арганізацыі і правядзеньня сьвяткаваньня 27 ліпеня гадавіны падпісаньня Дэклярацыі аб сувэрэнітэце. Тады ж «Беларускі дом ва Ўкраіне» спрабаваў сарваць падзею ў парку імя Тараса Шаўчэнкі ў Кіеве і арганізаваў альтэрнатыўную акцыю.
- Адзін з заснавальнікаў і фармальны кіраўнік «Беларускага дому ва Ўкраіне» Віталь Шышоў зьнік раніцай 2 жніўня ў Кіеве, куды перабраўся зь Беларусі ўвосень 2020 году разам зь дзяўчынай. Паводле сяброў, ранкам ён звыкла пайшоў на прабежку і не вярнуўся.
- Шышоў быў адміністратарам тэлеграм-каналу «Беларускі дом ва Ўкраіне», таксама адміністраваў сайт арганізацыі. Рыхтаваў у Кіеве акцыі, звароты, здымаў і мантаваў відэа з акцыяў. Дапамагаў уцекачам зь Беларусі прадуктамі і рэчамі. Працаваў праграмістам-фрылансэрам, а ў вольны ад працы і беларускай справы час займаўся спортам.
- Трэцяга жніўня яго знайшлі павешаным у Сьвятошынскім парку Кіева непадалёк ад ягонага дому. На цела натрапілі прадстаўнікі «Беларускага дому ва Ўкраіне», якія раніцай аднавілі пошукі. На твары Шышова былі сьляды пабіцьця, прызначана экспэртыза.
- Былы міністар замежных справаў Украіны Паўло Клімкін у сваім фэйсбуку выказаў упэўненасьць, што Шышова забілі спэцслужбы Беларусі, і задаў пытаньне, ці могуць украінцы давяраць сваім спэцслужбам, калі тыя ня могуць перадухіліць замахі на праціўнікаў Лукашэнкавага рэжыму, якія ратуюцца ад перасьледу ва Ўкраіне. Тады ж кіраўнік аддзелу расьсьледаваньняў Bellingcat Хрыста Грозеў заявіў, што ў апазыцыйныя беларускія структуры ва Ўкраіне інтэграваліся супрацоўнікі расейскага ФСБ пад прыкрыцьцём; ён таксама ня выключыў, што Шышова менавіта забілі.
- Прадстаўнік «Беларускага дому ва Ўкраіне» Юры Шчучко сказаў, што актывісты «Беларускага дому ва Ўкраіне» атрымлівалі інфармацыю, у тым ліку з СБУ, што ва Ўкраіну прыяжджаюць прадстаўнікі беларускіх спэцслужбаў «для фізычнага зьнішчэньня нашых актыўных чальцоў».
- Паплечнікі Шышова паведамляюць, што ён ня раз заўважаў за сабой сачэньне.
- Кіраўнік Нацыянальнай паліцыі Ўкраіны Ігар Кліменка 3 жніўня назваў дзьве асноўныя вэрсіі гібелі беларуса, якія разглядае яго ведамства: самагубства і забойства з імітаваньнем самагубства. А таксама сказаў, што сам Шышоў з паведамленьнямі пра сачэньне за сабой у паліцыю ніколі не зьвяртаўся.
- Дзяўчына Шышова — Бажэна Жолудзь, якая таксама паходзіць з Рэчыцы, узгадала, што ў Віталя ў апошнія тыдні былі кепскія прадчуваньні, таксама яна ўспомніла, што да яе ў цэнтры Кіева падыходзілі незнаёмыя, як высьветлілася, каб здымаць на відэа. Суіцыдальных думак яна ў свайго хлопца не заўважала.