Затрымалі бізнэсоўца Юрыя Чыжа і мэнэджараў зь ягонага атачэньня. Сваякі пацьвердзілі: «Артыкул знойдуць»

Як стала вядома «Нашай ніве», увечары 15 сакавіка быў затрыманы бізнэсовец Юры Чыж. Пра гэта паведамілі выданьню дзьве незалежныя адна ад адной крыніцы.

Разам з прадпрымальнікам затрымалі і кіраўнікоў некалькіх кампаній, якія засталіся ў Чыжа пасьля разгрому ягонай бізнэс-імпэрыі.

КДБ ніяк не камэнтуе падзеі, а сваякі Чыжа пацьвердзілі Onliner факт і дату яго затрыманьня. Артыкул, паводле якога адбылося затрыманьне, яны пакуль ня ведаюць, але кажуць, што «артыкул знойдуць».

Паводле папярэдняй інфармацыі, затрыманьне перагукаецца з крымінальнай справай, якую на Чыжа завялі ў 2016-м. Тады ён паўгода правёў за кратамі праз падазрэньне ва ўхіленьні ад сплаты падаткаў і збораў у асабліва буйным памеры, але выйшаў на волю пасьля таго, як прызнаў віну і сплаціў шкоду.

Але па стане на 2021 год Чыж нібыта заставаўся вінен і дзяржаве, і бізнэс-партнэрам, якія спаганялі зь яго даўгі праз суд. Аднак былы алігарх, калісьці набліжаны да Лукашэнкі, па абавязаньнях нібыта не плаціў, хаця асобныя яго прадпрыемствы працавалі ў «плюс».

Справы Чыжа за апошнія гады моцна пагоршыліся, у рэйтынгу ўплывовых бізнэсоўцаў ён скаціўся на 88-е месца, хоць у канцы 2000-х узначальваў сьпіс.

Прэтэнзіі ў сілавікоў узьніклі да топ-мэнэджмэнту «Кварцкрэйдапрам» — прадпрыемства ў Маларыцкім раёне, якое забясьпечвала крэйдай бярозаўскі завод будматэрыялаў, які належыць Чыжу. Таксама нібыта затрымалі кагосьці з кіраўнікоў «Данпрад» — прадпрыемства на Валожыншчыне, якое вырабляла сьвініну.

Прыйшлі і ў «НафтаХімТрэйдынг» — адзін з апошніх бізнэсаў Чыжа, які пасьпяхова працягваў працаваць. У сеткі з 11 заправак, тры зь якіх знаходзяцца ў Менску, месяц таму забралі ліцэнзію на продаж паліва.

Паводле інфармацыі Tut.by, 16 сакавіка сілавікі прыходзілі ў адміністрацыю ТАА «Ракаўскі Бровар», якое кіруе аднайменным рэстаранам у цэнтры Менску. Задавалі пытаньні, якія тычацца нерухомасьці і арэнды зямлі. Канфіскавалі некаторыя дакумэнты.

Кантрольны пакет «Ракаўскага Бровару» належыць Сьвятлане Чыж, таксама сярод уладальнікаў Уладзімер Япрынцаў і Жанна Герасімук. З моманту заснаваньня ў 1997 годзе і да 13 чэрвеня 2019 году сузаснавальнікам быў і Юры Чыж.

Справа аб банкруцтве «Трайплу»

У цяперашні час у Эканамічным судзе Менску разглядаецца справа аб банкруцтве кампаніі «Трайпл». Пакуль крэдыторы не прынялі рашэньня «як аб ліквідацыі, так і аб санацыi» кампаніі, прызначаная фінансава-эканамічная экспэртыза.

Асноўны від дзейнасьці «Трайпла» — будаўніцтва жылых і камэрцыйных аб’ектаў. Кампанія таксама мае пяць філіялаў: рэстаран «Залаты грабеньчык», Лядовая арэна ў Бярозе, гарналыжная база «Лагойск», сельгаспрадпрыемства «Трайпл-Агра» і спа-цэнтар у Менску. Юрыю Чыжу належаць 66,5% кампаніі.

Астатняя доля пароўну падзелена паміж расейцамі Іосіфам Аксеньцьевым і Міхаілам Маміяшвілі (па 16,75%). Яны атрымалі гэтую долю пасьля рэзананснай спрэчкі Чыжа са шматгадовым партнэрам Япрынцавым, які цяпер валодае акцыямі «Ракаўскага бровару».