Дзясяткі кавярняў, усе крамы нацыянальнай атрыбутыкі. Гэтыя месцы перасталі існаваць пасьля выбараў

Кавярні

Bistro de Luxe

Гэты клясычны рэстаран францускай кухні адкрыўся ў Менску ў 2010 годзе. Аб закрыцьці рэстарацыі стала вядома ў сьнежні. Гэта адзін з праектаў рэстаратара Вадзіма Пракоп’ева, які зьехаў зь Беларусі яшчэ да выбараў і выказаўся супраць Лукашэнкі.

ID Bar

Кавярня зь цікавым дызайнам каля мэтро «Плошча Перамогі» ў Менску была папулярнаю ў 2010-я. Кавярня зачынілася ў лістападзе мінулага году, пакінуўшы месца піўному бару, які мае адкрыцца тут неўзабаве.

Tapas Bar

Кавярня з гішпанскай кухняй і атмасфэрай — таксама праект рэстаратара Вадзіма Пракоп’ева. Месца на Інтэрнацыянальнай перастала існаваць напрыканцы лістапада.

BarDuck

Кактэйльны бар па вуліцы Інтэрнацыянальнай праіснаваў 7 гадоў і зачыніўся летась. Гаспадары паабяцалі новы праект.

Кавярня «26»

Адна з найлепшых кавярняў гораду на Сьвярдлова зачынілася 10 студзеня. Тутэйшыя барысты ня раз перамагалі ў тэматычных чэмпіянатах. Гаспадары абяцаюць хутка зьявіцца на рынку з новым праектам.

Mai Thai

Рэстаран тайскай кухні на Кірава. Месца праіснавала 5 гадоў і зачынілася разам зь іншымі праектамі Вадзіма Пракоп’ева.

Pelican

Адзін з самых сьвежых праектаў Вадзіма Пракоп’ева, які адкрыўся толькі ў 2018 годзе. Гэта быў бар з кактэйлямі і асобным пакоем для курэньня.

MJOD

Бар з крафтавым півам і закускамі за Чырвоным касьцёлам праіснаваў менш чым год. Месца адкрылася ў разгар першай хвалі каранавірусу і пратрымалася да лістапада.

el Pushka

Папулярны бар у мэксыканскім стылі на Свабоды, 23 закрыўся ў студзені. Уладальнікі паабяцалі, што адкрыюцца зноў, але «не цяпер і ня тут».

Svobody.4

Папулярны вінны бар абвясьціў пра сваё закрыцьцё ў лютым, цяпер гаспадары распрадаюць маёмасьць. Як і многія іншыя пералічаныя тут кавярні, бар не працаваў 26 кастрычніка, калі была абвешчана забастоўка.

O’Petit

Менавіта ў гэтай кавярні падчас акцыі 6 верасьня Мікалай Карпянкоў, які тады ўзначальваў ГУБАЗік, біў шкляныя дзьверы, каб сілавікі маглі затрымаць пратэстоўцаў, якія схаваліся ў кавярні. 4 сьнежня гаспадары кавярні абвясьцілі, што закрываюцца на нявызначаны тэрмін.

Сетка «Старамесцкі півавар»

Гэта сетка аб’ядноўвала адразу некалькі месцаў у Менску: Beerhold, Bruxelles, Butler, «Хинкали искали?». Усе гэтыя кавярні цяпер зачыніліся. Брэнд «Старамесцкі півавар» зьявіўся ў Менску ў 2013 годзе, гэта былі кавярні з крафтавым півам і закускамі.

«Хулиган»

Культавы менскі бар, які адным зь першых зьявіўся на тусовачнай вуліцы Кастрычніцкай яшчэ ў 2013 годзе. Месца зачынілася ў лістападзе.

SeaFoodBar

Адзін з найлепшых рыбных рэстаранаў Менску месьціўся на Рэвалюцыйнай. Рэстаран адкрыўся ў 2019 годзе, яго высока ацанілі замежныя крытыкі. 1 лютага ўладальнікі абвясьцілі пра закрыцьцё.

Гэта далёка ня ўсе кавярні, якія зачыніліся пасьля пандэміі і падзеяў вакол выбараў, мы пералічылі толькі найбольш памятныя і вядомыя. Агулам такіх месцаў — дзясяткі.

Крамы нацыянальнай атрыбутыкі і адзеньня

Менск

Офлайнавых крамаў нацыянальнай атрыбутыкі ў Менску амаль не засталося. Праз праверкі і штрафы закрыліся крамы «Мой модны кут», symbal.by, LSTR Adzieńnie. Чатырох супрацоўнікаў крамы symbal.by пакаралі арыштамі.

Іншыя гарады

Праз праверкі, штрафы і візыты сілавікоў вымушаныя былі закрыцца крама «Князь Вітаўт» у Берасьці, этнакрама «Цудоўня» ў Горадні, «Цудоўная крама» ў Воршы, арт-паб «Торвальд» у Віцебску. У Менску і рэгіёнах фактычна не засталося крамаў з нацыянальнай атрыбутыкай.

Прадуктовыя крамы

12 лютага стала вядома пра затрыманьне гаспадара сеткі крамаў Green Генадзя Кірэйкава. Раней з крытыкай на «адну з гандлёвых кампаній» абрынуўся Лукашэнка. Пакуль Green усё яшчэ працуе.

Таксама жыхары Менску заўважылі, што ў крамах сеткі Bigzz апусьцелі паліцы. Сетка мае даўгі, але яна не банкрут. Цяпер, па інфармацыі СМІ, уладальнікі шукаюць пакупнікоў на свае крамы.