Мы сабралі інфармацыю пра некаторыя іншыя галадаваньні пратэсту, якія трываюць або трывалі апошнім часам у розных месцах сьвету.
Вязьні турэцкіх турмаў
Турэцкія праваабаронцы паведамілі 18 студзеня, што ў 107 турэцкіх турмах ужо 49-ы дзень трываюць галадоўку пратэсту супраць парушэньня правоў вязьняў і ўмоваў іх утрыманьня.
ГЛЯДЗІЦЕ ТАКСАМА: Сьвятар хадайнічаў перад Сьледчым камітэтам, каб стаць паручальнікам Ігара Лосіка, які галадае ў турме 37 дзёнВязьні канадзкай турмы
Група вязьняў турмы ў Калгары (правінцыя Альбэрта ў Канадзе) тыдзень таму абвясьціла галадоўку, пратэсьтуючы супраць жорсткага каранавіруснага локдаўну, які абмежаваў іх права пакідаць камэры да 45 хвілін у дзень і пагоршыў гігіенічныя ўмовы.
Вязьні каліфарнійскіх турмаў
Зьняволеныя ў турмах акругі Санта-Клара (Каліфорнія) на мінулым тыдні абвясьцілі галадоўку з прычыны ўсплёску захворваньняў на COVID-19 сярод іх, лічачы, што галоўная віна ў антысанітарных і жорсткіх умовах утрыманьня вязьняў.
ГЛЯДЗІЦЕ ТАКСАМА: Кіраўніцтва Радыё Свабода: Жыцьцё Ігара Лосіка пад пагрозай пасьля шасьцітыднёвай галадоўкіЛекары ў Пэру
У сталіцы Пэру Ліме чатыры лекары пачалі галадоўку, пратэстуючы супраць таго, што яны лічаць непрымальнымі ўмовамі працы і недахопам патрэбнага мэдычнага абсталяваньня і лекаў падчас каранавіруснай пандэміі.
Двое брытанскіх падлеткаў
Двое падлеткавых актывістаў барацьбы з глябальным пацяпленьнем другі тыдзень галадаюць у графстве Камбрыя (паўночна-заходняя Англія) у знак пратэсту супраць урадавай пастановы адкрыць мясцовую вугальную шахту. Элайджа Макензі-Джэксан (17) і Лізі Грын (15) адмаўляюцца ад усялякай ежы ў надзеі пераканаць урад перагледзець тое, што яны называюць «вар'яцкім» і «амаральным» рашэньнем.
ГЛЯДЗІЦЕ ТАКСАМА: Дзьве студэнткі аб’явілі галадоўку на знак салідарнасьці зь Ігарам ЛосікамФранцускі пекар
Гэтая галадоўка закончылася шчасьліва. Францускі пекар Стэфан Равакле з гораду Бэзансон галадаў 11 дзён, пратэстуючы супраць намеру ўладаў дэпартаваць ягонага вучня, які два гады таму нелегальна прыбыў у Францыю на лодцы празь Міжземнае мора. Галадоўка закончылася перамогай – улады легалізавалі побыт 18-гадовага хлопца з Гінэі.
ГЛЯДЗІЦЕ ТАКСАМА: Народнае антыкрызіснае кіраваньне заклікала краіны Захаду дапамагчы ўратаваць галадоўніка ЛосікаКрымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.