Хрысьціяне розных канфэсій выйшлі з хрэсным ходам супраць гвалту, што чыніцца ў Беларусі.
Каля 13-й гадзіны побач з архікатэдральным касьцёлам Найсьвяцейшай Панны Марыі сабраліся каля 70 чалавек: праваслаўныя з абразамі, каталікі з ружанцамі і пратэстанты зь Бібліямі. Чытаючы «Ойча наш», яны прайшлі ад плошчы Свабоды да галоўнага праваслаўнага храма сталіцы — Сьвята-Духавага сабору, дзе іх чакалі яшчэ прыкладна столькі ж чалавек.
На чале хрэснага ходу ішлі трое сэмінарыстаў і дыякан архікатэдральнага касьцёла Юры Рашатко. Гэта малітоўная акцыя. Яны вераць, што з дапамогай малітвы можна спыніць гвалт, які чыніцца ў краіне.
У Сьвята-Духавым саборы прайшла служба за Беларусь.
Беларускі экзархат Расейскай праваслаўнай царквы (БПЦ) адмежаваўся ад гэтай акцыі. У паведамленьні БПЦ гаворыцца: «Заклікі, якія распаўсюджваюцца ў сетцы інтэрнэт, узяць удзел у акцыі так званага „хроснага ходу“ прадстаўнікоў розных хрысьціянскіх канфэсій зь Бібліямі і абразамі каля Сьвята-Духавага катэдральнага сабору ня мае дачыненьня да дзейнасьці Беларускай праваслаўнай царквы».
«Разам з тым пазыцыя Беларускай праваслаўнай царквы заключаецца ў тым, каб заклікаць да міру, паблажлівасьці і ўзаемаразуменьня бакі супрацьстаяньня, а не напальваць сытуацыю і падбухторваць да розных акцый. Беражыце сябе і сваіх блізкіх, не паддавайцеся на правакацыі і дзейнічайце ў межах закону хрысьціянскай любові і заканадаўства Рэспублікі Беларусь», — заклікалі ў БПЦ.
ГЛЯДЗІЦЕ ТАКСАМА: «Прымушалі сьпяваць гімн, хто ня ведаў — зьбівалі». У Берасьці вызвалены зь міліцыі падлетак заявіў пра катаваньні ГЛЯДЗІЦЕ ТАКСАМА: «Б’юць да страты прытомнасьці». Што адбываецца пасьля затрыманьня ў міліцыі ГЛЯДЗІЦЕ ТАКСАМА: «У дзіцяці ўвесь твар быў у крыві». У Горадні падчас аварыі з «Тыграм» пацярпела 5-гадовая дзяўчынка, у яе ЧМТ
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.