Выбары-2020

Прадстаўнік Дзярждэпартамэнту ЗША пацікавіўся ў Макея ходам прэзыдэнцкай кампаніі ў Беларусі

  • БелаПАН

Уладзімер Макей, архіўнае фота

«Актуальныя пытаньні беларуска-амэрыканскіх адносін», «бягучыя пытаньні рэгіянальнага і міжнароднага парадку дня» абмеркавалі падчас тэлефоннай размовы 22 ліпеня міністар замежных спраў Уладзімер Макей і намесьнік дзяржаўнага сакратара ЗША ў палітычных пытаньнях Дэйвід Гэйл.

Размова адбылася на ініцыятыву амэрыканскага боку, паведаміла прэс-служба беларускага замежнапалітычнага ведамства.

Акрамя таго, «на просьбу амэрыканскага боку Макей дэталёва праінфармаваў суразмоўцу пра нюансы прэзыдэнцкай кампаніі ў Рэспубліцы Беларусь». Падрабязнасьцей не прыводзіцца.

15 ліпеня прэс-сакратарка Дзярждэпартамэнту ЗША Морган Ортагус заявіла, што ЗША занепакоеныя паведамленьнямі аб масавых пратэстах і затрыманьнях мірных актывістаў у Беларусі.

ГЛЯДЗІЦЕ ТАКСАМА: Што Макей адказаў на патрабаваньне Эўразьвязу вызваліць суперніка Лукашэнкі
ГЛЯДЗІЦЕ ТАКСАМА: Дзяржаўны дэпартамэнт ЗША заклікаў Беларусь паважаць асноўныя правы і свабоды грамадзянаў

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.