Дзяржаўны тэлеканал «Беларусь-1» пакажа 4 лютага ў «Панараме» сюжэт «Сахарная мафия», які называюць «вялікім расьсьледаваньнем Агенцтва тэлевізійных навінаў».
Паводле раскладу, «Панарама» пачнецца ў 21:00, а на 21:50 заплянаваны «спэцыяльны рэпартаж Агенцтва тэлевізійных навінаў».
У анонсе кажуць, што ў «цукровай справе»
- пад сьледзтвам чатыры дырэктары цукровых заводаў (у кадрах анонсу паказвалі фота пяці чалавек);
- страты заводаў зьвязаныя з асабістымі інтарэсамі фігурантаў справы;
- штогод хабары дасягалі сумарна соцень тысяч даляраў.
У канцы мінулага студзеня ў Беларусі зьніклі дырэктары адразу ўсіх чатырох цукровых заводаў — 27 студзеня на працу ня выйшаў ніводзін зь іх.
4 лютага Аляксандар Лукашэнка ўпершыню пракамэнтаваў рэзанансную справу:
«Што зрабілі гэтыя дзялкі: яны стварылі ў Маскве „пракладку“, гандлёвы дом. Звычайная „пракладка“. Паставілі туды сваіх. З заводаў па заніжаных цэнах прадавалі гандлёваму дому ў Маскве беларускі цукар. Тыя, павялічыўшы цану, прадавалі на рынку. Розьніцу хабарамі раздавалі гэтым дырэктарам заводаў».
Паводле яго, таксама «там трапіліся і людзі ў пагонах». На ягоны загад, казаў Лукашэнка, «цягам сутак „замялі“ ўсіх», і сапраўды разьвярнулі самалёт, які ляцеў зь Менску ў Мюнхен, каб «затрымаць аднаго зь дзеячоў».
ГЛЯДЗІЦЕ ТАКСАМА: «Ён гаспадар, сам усё робіць» — што кажуць у Слуцку пра нібыта затрыманага дырэктара цукровага камбінату ГЛЯДЗІЦЕ ТАКСАМА: «Не пішыце пра яго дрэнна, усё адно не паверым». Што ў Гарадзеі кажуць пра зьнікненьне дырэктара цукровага камбінату