Днём раней Сіўчыку таксама далі 15 сутак, хоць ён быў за мяжой. Прысуды Сіўчыку адкладалі цэлы месяц.
У судзе Партызанскага раёну Менску 4 лютага прайшоў чарговы суд над лідэрам руху салідарнасьці «Разам» Вячаславам Сіўчыкам. Судзьдзя Аляксандар Барысёнак, як піша «Прававая ініцыятыва», зачытаў вырак: 15 сутак арышту за «парушэньне парадку правядзеньня масавых мерапрыемстваў» на акцыі пратэсту супраць інтэграцыі Беларусі і Расеі 20 сьнежня.
3 лютага Барысёнак абвясьціў такі самы прысуд. Як і тады, на паседжаньні 4 лютага Сіўчык не прысутнічаў.
Днём раней Сіўчык казаў Свабодзе, што той прысуд — «надзвычай грубае парушэньне беларускага заканадаўства» і «палітычна матываваныя рэпрэсіі». На ягоную думку, пракурор мусіць сам абскардзіць такі прысуд.
Таксама палітык адзначыў, што пасьля месяца адкладаньняў вырак яму вынесьлі «адразу, як толькі дзяржаўны сакратар Злучаных Штатаў Амэрыкі Майк Пампэо пакінуў тэрыторыю Рэспублікі Беларусь».
Акрамя ўчорашняга суду за акцыю 8 сьнежня і сёньняшняга за 20 сьнежня, Сіўчыка чакаюць яшчэ тры працэсы ў судзе Партызанскага раёну — штодзень да 7 лютага.
За сьнежаньскія акцыі раней 13 чалавек былі асуджаныя агулам на 345 сутак арышту, аштрафаваныя на 129 тысяч рублёў.
«Паглыбленьне інтэграцыі» Беларусі і Расеі. Што важна ведаць
Аляксандар Лукашэнка і Ўладзімір Пуцін, ліпень 2019
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»