Палітыка

У Менску на Дзень Волі заплянавалі канцэрт у Кіеўскім сквэры. Ёсьць дазвол уладаў

Сьвяткаваньне 100 гадоў Беларускай Народнай Рэспублікі каля Опэрнага тэатру ў Менску, 25 сакавіка 2018 году

Лідэры руху «За свабоду», Аб’яднанай грамадзянскай партыі, Беларускай хрысьціянскай дэмакратыі і Беларускай сацыял-дэмакратычнай партыі («Грамада») акрэсьлілі фармат сьвяточных імпрэзаў, прысьвечаных Дню Волі.

Прадстаўнікі дэмакратычных сілаў нагадалі, што атрымалі адмоўныя адказы на ўсе заяўкі пра адрасы сьвяткаваньня 101-й гадавіны абвяшчэньня незалежнасьці Беларускай Народнай Рэспублікі. У Менгарвыканкаме параілі зьбірацца ў месцах, адведзеных для гэтага гарадзкімі ўладамі.

Кампанія #БНР101, якая зьбіралася ладзіць канцэрт у Менску 23 сакавіка, адмовілася ад прапанаваных месцаў і перанесла галоўную імпрэзу ў Горадню, дзе ўлады далі дазвол на канцэрт у Каложскім парку. Гэта не адмяняе акцыі 24 сакавіка ў менскім Кіеўскім сквэры.

ГЛЯДЗІЦЕ ТАКСАМА: Чаму галоўны канцэрт #БНР101 перанесьлі зь Менску ў Горадню? Белавус і Пальчыс растлумачылі па пунктах
ГЛЯДЗІЦЕ ТАКСАМА: На #БНР101 у Менску будзе канцэрт і ўрачысты прыём. А шэсьці і мітынгі?

Старшыня руху «За свабоду» Юры Губарэвіч адзначыў складаны працэс сёлетняга ўзгадненьня — як з уладай, так і ўнутры дэмакратычнай супольнасьці. Тым ня менш 24 сакавіка ў Кіеўскім сквэры адбудзецца канцэрт, як таго вымагае сьвяточны фармат, паведаміў Губарэвіч.

Юры Губарэвіч

«Яшчэ на мінулым тыдні мы падалі паведамленьне ў Менгарвыканкам наконт пляцоўкі ў Кіеўскім сквэры, якая зьмяшчае ня меней людзей, чым ля Опэрнага тэатру, — адзначыў Юрась Губарэвіч. — Пачатак а 12-й, сама імпрэза пачнецца праз гадзіну. Будзе канцэрт беларускіх выканаўцаў. Выдаткі могуць перавысіць 5 тысяч даляраў, але талакой сабрана сродкаў удвая больш, таму павінны ўкласьціся».

ГЛЯДЗІЦЕ ТАКСАМА: Арганізатары #БНР101 прапанавалі запускаць фаервэркі 25 сакавіка

Увечары 19 сакавіка заяўнікі запрошаныя ў Менгарвыканкам, каб удакладніць фармат імпрэзы і захады бясьпекі. Удзельнікі нагадалі, што спачатку «Арт-сядзіба» і БНФ «Адраджэньне» падалі заяўку на сьвяткаваньне Дня Волі на стадыёне «Дынама», іншыя рухі супольна прасілі дазволіць канцэрт ля Опэрнага тэатру. Прыйшлі адмовы.

Тады зьвярнуліся з ініцыятывай адзначыць дату адкрыцьцём мэмарыяльнай дошкі на доме па вуліцы Валадарскага, 9, якую ўлады абяцалі адкрыць яшчэ год таму. Ніякага адказу пакуль няма.

ГЛЯДЗІЦЕ ТАКСАМА: Улады Горадні дазволілі сьвяткаваць #БНР101. Будуць мітынг, канцэрт і дзіцячыя пляцоўкі
ГЛЯДЗІЦЕ ТАКСАМА: Хто сьпяе на #БНР101? Анансавалі склад выступоўцаў на канцэрце ў Горадні 23 сакавіка

Сустаршыня БХД Віталь Рымашэўскі паведаміў, што ўлады па-ранейшаму ня хочуць шырока адзначаць гадавіну абвяшчэньня БНР — адмову атрымалі практычна ўсе заяўнікі, акрамя Горадні. У Берасьці традыцыйна плянуецца акцыя супраць акумулятарнага заводу, якую апазыцыйныя сілы хочуць сумясьціць са сьвяткаваньнем.

Афіша ўдакладняецца і будзе агучаная 20 сакавіка.

Выканаўца абавязкаў старшыні АГП Мікалай Казлоў панаракаў на «бандытызм» з боку ўладаў, якія абкладаюць масавыя акцыі несувымернымі паборамі – найперш на міліцыю, якую беларусы і без таго ўтрымліваюць.

ГЛЯДЗІЦЕ ТАКСАМА: Да 6375 рублёў толькі за ахову. Урад вызначыў, колькі плаціць за правядзеньне масавай акцыі

На 25 сакавіка заплянавалі ўскладаньне кветак

Мікалай Казлоў заявіў, што 25 сакавіка а 18.30 ён плянуе прайсьці ад Кастрычніцкай плошчы да Валадарскага, 9, каб ускласьці кветкі да будынка, дзе адбываліся гістарычныя падзеі. Да гэтай ініцыятывы выказалі жаданьне далучыцца Віталь Рымашэўскі, Юрась Губарэвіч і Ігар Барысаў.​

Пра пляны Беларускага нацыянальнага кангрэсу, кіраўніцтва якога звычайна агітуе за вулічныя акцыі, апазыцыйныя палітыкі ня ведаюць — хоць і кажуць, што застаюцца ў каардынацыі зь Мікалаем Статкевічам і Ўладзімерам Някляевым.

Стрыжнёвая тэма #БНР101, як адзначыў Юрась Губарэвіч, — умацаваньне незалежнасьці Беларусі і выхад з усіх саюзных дамоваў пад пратэктаратам Крамля. Падчас канцэрту плянуецца збор подпісаў за гэта.

Што важна ведаць пра Дзень Волі-2019?

  • 1 сакавіка — Аляксандар Лукашэнка вусна забараніў сьвяткаваць Дзень Волі канцэртам на стадыёне «Дынама», як таго хацелі арганізатары #БНР100 — кажа: «Ідзіце на Бангалёр».
  • 23 сакавіка ў Горадні — канцэрт у Калоскім парку з удзелам Зьмітра Вайцюшкевіча, Лявона Вольскага, гуртоў Nizkiz, «Крама», «Дай дарогу!» і Dzieciuki. Ад 3 да 5 тысяч гледачоў.
  • 23–24 сакавіка — акцыі беларусаў у Варшаве, Вільні, Кіеве, Нью-Ёрку, Празе ды іншых гарадах.
  • 24 сакавіка ў Менску — мітынг-канцэрт у Кіеўскім сквэры з удзелам «Дай дарогу», N.R.M., «Разьбітага сэрца пацана» ды іншых. Ад 1500 (паводле міліцыі) да 5–7 тысячаў (паводле арганізатараў) гледачоў. Затрыманыя Натальля Басалыга-Гарачка і Зьміцер Дашкевіч.
  • 25 сакавіка ў Гомлі — акцыя памяці герояў БНР.
  • 25 сакавіка ў Віцебску — адзіночны пікет Барыса Хамайды, які расцанілі як «парушэньне парадку ўтрыманьня населеных пунктаў».
  • 25 сакавіка ў розных гарадах — людзі вывешвалі бел-чырвона-белыя сьцягі на заклік арганізатараў #БНР101, уладам не спадабалася.
  • 25 сакавіка ў Менску на Кастрычніцкай плошчы — акцыя Алены Талстой (прыкавала сябе да слупа), затрыманьні палітыкаў і мінакоў. Праз тры гадзіны вызваленыя ўсе, акрамя Талстой, пратаколаў аб парушэньнях не складалі.
  • 25 сакавіка ў Менску на пешаходных вуліцах — затрыманьні музыкаў (Аракелян, Вайцюшкевіч, Варашкевіч і Вольскі), якія анансавалі, што зьбіраюцца прагуляцца і ўзяць з сабой музычныя інструмэнты. Пасьля затрыманьня дзясяткі людзей сьпявалі хорам песьні Вольскага, міліцыя пагражала затрыманьнямі і гвалтам. Праз тры гадзіны музыкі вызваленыя.
  • 25 сакавіка ў розных гарадах — салюты ў гонар Дня Волі.

Што яшчэ пачытаць, паслухаць, паглядзець пра БНР