Як паведаміў БелаПАН афіцыйны прадстаўнік Упраўленьня Сьледчага камітэту па Менску Аляксандар Герасімаў, сабраныя доказы не пацьвярджаюць, што падазраваныя супрацоўнікі міліцыі ўчынілі дзеяньні, якія крымінальна караюцца.
У той жа час, адзначыў ён, «устаноўлены парушэньні міліцыянтамі Крымінальна-працэсуальнага кодэксу пры правядзеньні працэсуальных дзеяньняў». Таму да іх прымененыя меры дысцыплінарнага ўзьдзеяньня.
Аб катаваньнях у дачыненьні да Сарочыка, вартаўніка аўтастаянкі, якая знаходзіцца на вуліцы Малініна ў Менску і належыць УП «Рамэн», паведаміла праваабарончая інфармацыйна-асветніцкая ўстанова «Плятформа». На сайце «Плятформы» быў размешчаны відэазапіс аповяду пацярпелага. Затым ён паўтарыў свой аповяд на прэс-канфэрэнцыі.
Інцыдэнт адбыўся сёлета 14 лістапада. Па словах Сарочыка, у пункт аховы аўтастаянкі прыйшлі два супрацоўнікі праваахоўных органаў, адзін зь якіх быў у цывільным. Не прад’яўляючы дакумэнтаў і нічога не тлумачачы, яны загадалі вартаўніку накіравацца ў Ленінскі РУУС. Каля гадзіны Сарочык знаходзіўся ў памяшканьні дзяжурнай частцы, а затым яго адвялі на допыт. Пазьней высьветлілася, што допыт праводзіла опэрупаўнаважаная Ленінскага РУУС Багданоўская Жана.
Па словах Сарочыка, опэрупаўнаважаная надзела на яго кайданкі і стала зьбіваць, патрабуючы прызнацца ў крадзяжы надмагільных пліт, якія захоўваліся на тэрыторыі аўтастаянкі, а таксама саляркі і акумулятараў з машын. Акрамя таго, ад вартаўніка спрабавалі дамагчыся прызнаньня ў тым, што ён пэрыядычна рабаваў кіёскі на рынку.
Your browser doesn’t support HTML5
«Яна сымпатычная, але натуральны зьвер»
Пэнсыянэр паспрабаваў растлумачыць, што ня ведае, пра што ідзе гаворка, але пасля гэтага пабоі толькі ўзмацніліся. Як сьцвярджае Сарочык, яго білі нагамі і дубінкамі па галаве і целе, да зьбіцьця пэрыядычна падлучаліся іншыя супрацоўнікі РУУС. Катаваньні суправаджаліся нецэнзурнай лаянкай і пагрозамі забойства. Калі пажылы чалавек губляў прытомнасьць, яго прыводзілі ў пачуцьцё, абліваючы халоднай вадой.
Your browser doesn’t support HTML5
Васіль Сарочык пра зьбіцьцё ў міліцыі
Усё гэта доўжылася прыкладна шэсьць гадзінаў, але ніякага прызнаньня ад Сарочыка міліцыянты не атрымалі. У выніку ў дачыненьні да яго склалі нейкі дакумэнт, які пэнсыянэр падпісаў, будучы ўжо ня ў стане яго прачытаць, і адпусьцілі дадому.
Зь міліцыі Сарочык адправіўся ў 10-ю гарадзкую клінічную бальніцу, каб зьняць пабоі, але там ад яго запатрабавалі накіраваньне з РУУС. Тады зьбіты вартаўнік зьвярнуўся з заявай у пракуратуру Ленінскага раёну Менску і ў ІПУ «Плятформа» з просьбай аб дапамозе. «Плятформа», у сваю чаргу, паінфармавала аб тым, што здарылася, Генпракуратуру, МУС і Сьледчы камітэт. Пракуратура накіравала матэрыялы ў Ленінскі раённы аддзел СК, які праводзіў праверку, затым працу працягнула ўпраўленьне Сьледчага камітэту па Менску.
У канцы лістапада зьявілася інфармацыя, што на Сарочыка пачаўся ціск з боку міліцыі. Яму тэлефанавалі прадстаўнікі Ленінскага РУУС, на аўтастаянцы, дзе ён працуе, спрабавалі пабываць некалькі супрацоўнікаў органаў унутраных спраў. Праваабаронцы лічаць, што міліцыянты хацелі прымірыцца з пэнсыянэрам.
12 сьнежня МУС і СК афіцыйна заявілі, што асноўная задача сьледзтва па справе аб перавышэньні ўлады супрацоўнікамі Ленінскага РУУС — «правядзеньне незалежнага расьсьледаваньня і ўсталяваньне ісьціны».
13 сьнежня была абвешчана: сьледзтва прызнала падазраванымі ў зьдзяйсьненьні злачынства па ч. 3 арт. 426 КК чатырох службовых асобаў Ленінскага РУУС.
11 сьнежня былі праведзены працэдуры апазнаньня. Па іх выніках, а таксама на падставе іншых матэрыялаў крымінальнай справы сьледзтвам былі прынятыя працэсуальныя рашэньні аб прызнаньні супрацоўнікаў міліцыі падазраванымі. Мера стрыманьня ў дачыненні да іх не абіралася.
У статусе падазраваных знаходзіліся оперупаўнаважаны Жанна Багданоўская і трое супрацоўнікаў-мужчын, якіх апазнаў Сарочык.
Цяпер крымінальная справа ў дачыненьні да супрацоўнікаў Ленінскага РУУС Менску, удзельнікаў інцыдэнту з вартаўніком аўтастаянкі Васілём Сарочыком, спынена.