Былы агент савецкай і брытанскіх выведак Алег Гардзіеўскі памёр на 87-м годзе жыцьця.
Алег Гардзіеўскі памёр у сваім доме ў Вялікай Брытаніі, перадае ВВС.
Атрымаўшы пасаду рэзыдэнта КДБ у Лёндане, палкоўнік Гардзіеўскі быў адкліканы ў Маскву і здолеў уцячы за мяжу, ратуючыся ад выкрыцьця.
Гардзіеўскі нарадзіўся ў Маскве, ягоны бацька служыў у НКУС, а старэйшы брат быў нелегальным выведнікам. Яго другая жонка Лэйла была дачкой генэрал-маёра КДБ.
Аднак Гардзіеўскі яшчэ студэнтам расчараваўся ў камуністычнай сыстэме і быў завэрбаваны ў першай замежнай камандзіроўцы ў выведцы.
Пабудаваўшы пасьпяховую кар’еру, у тым ліку за кошт сямейных сувязяў, Гардзіеўскі выкрыў шэраг савецкіх агентаў і ўнёс значны ўклад у спыненьне крызісу ў адносінах паміж СССР і краінамі Заходняга блёка, падрыхтаваўшы адразу з брытанскага і савецкага боку візыт Міхаіла Гарбачова ў Вялікабрытанію ў 1984 годзе.
З дапамогай завэрбаванага агента ЦРУ Олдрыча Эймса КДБ амаль удалося вылічыць Гардзіеўскага. Ён быў адпраўлены ў Маскву з лёнданскай рэзыдэнтуры і прайшоў праз допыт, але быў адпушчаны і здолеў уцячы з дапамогай брытанскай выведкі.
У Лёндане, пасьля працяглай праверкі, падвойны агент стаў кансультаваць заходнія спэцслужбы. У 2007 годзе за заслугі ў забесьпячэньні нацыянальнай бясьпекі Вялікабрытаніі ён быў узнагароджаны ордэнам Сьвятых Міхаіла і Георгія, адной з вышэйшых узнагарод Злучанага Каралеўства. Гардзіеўскага называюць адным з самых каштоўных шпіёнаў у гісторыі, пра якіх стала вядома.
У Савецкім Саюзе яго пазбавілі воінскага званьня палкоўніка, узнагарод і вынесьлі завочны вырак да расстрэлу. Гэты прысуд, фармальна, ня быў адменены і ў Расеі. У 2008 годзе ён заявіў Радыё Свабода, што перажыў замах.
Гардзіеўскі неаднаразова быў госьцем эфіраў Расейскай службы Радыё Свабода.
