Вячаслаў Сіўчык больш не ўзначальвае Руху салідарнасьці «Разам», але застаецца сябрам Сойму. Сустаршынямі Руху абраныя Алесь Макаеў, Алена Талстая і Юры Ляшэнка.
Намесьнікамі сустаршыняў — Сьвятлана Софіна, Анатоль Кудласевіч, і Ян Лагвіновіч. Такія кадравыя рашэньні прынятыя на трэцім зьезьдзе Руху салідарнасьці «Разам», які прайшоў у выходныя.
15 траўня на другім зьезьдзе Руху старшыня Руху Вячаслаў Сіўчык не ўвайшоў у новае кіраўніцтва, патлумачыўшы сваё рашэньне неабходнасьцю ратацыі кадраў, безь якой немагчымае разьвіцьцё. Таму праз паўтара месяца Рух правёў яшчэ адзін зьезд і абраў новае кіраўніцтва. Фармаваньне найвышэйшага кіроўнага органу — Сойму — працягваецца.
Зьезд вызначыў тры галоўныя мэты дзейнасьці Руху:
- Барацьба з этнацыдам. У звароце да лідэраў і кіруючых органаў дэмакратычных партый і арганізацый Рух падкрэсьлівае: «Ужо 10 гадоў мы праводзім розныя акцыі, скіраваныя на адраджэньне нашай нацыі, вяртаньне беларусам сваёй сапраўднай гісторыі, ушаноўваючы памяць герояў і ахвяраў нашага народу». Іншыя арганізацыі запрошаны далучацца і праводзіць супольныя акцыі.
- Падтрымка прадпрымальнікаў. Рух патрабуе адмены ўсіх нарматыўных актаў, прынятых супраць беларускіх прадпрымальнікаў, у першую чаргу, указаў прэзыдэнта № 222 і № 48, а таксама прыняцьця закону аб малым бізнэсе і тэрміновай распрацоўкі новай дзяржаўнай праграмы ў падтрымку малога і сярэдняга бізнэсу.
- Барацьба за вызваленьне палітвязьняў. Рух салідарнасьці «Разам» патрабуе вызваленьня і поўнай рэабілітацыі Андрэя Бандарэнкі, Міхаіла Жамчужнага, Ільлі Валовіка, Вадзіма Бойкі, Зьмітра Паліенкі, Аляксандра Лапіцкага, Алеся Мілюкова (Жаўнова), Эдуарда Пальчыса, Тараса Аватарава, а таксама зьняволенага ў Расеі Кірыла Сілівончыка.
Кіраўніцтва Руху яшчэ ня вырашыла, ці будзе зьвяртацца ў Міністэрства юстыцыі па рэгістрацыю. Сёлета міністэрства ўжо адмовіла Руху ў рэгістрацыі, абгрунтаваўшы сваё рашэньне тым, што сьпіс заснавальнікаў ня ўтрымлівае поўных зьвестак аб працоўных тэлефонах, а адзін з заснавальнікаў падаў непраўдзівую інфармацыя пра месца працы.
Першы зьезд аргкамітэту Руху салідарнасьці «Разам» адбыўся ў чэрвені 2009 году. Рух зарэгістраваны ў Чэхіі, Польшчы, Літве.
