Канцэрт вядомага музыканта Лявона Вольскага, які прайшоў 27 ліпеня ў сталічным мікрараёне Сухарава ў рамках пікету па зборы подпісаў за вылучэньне кандыдатам у дэпутаты Алеся Лагвінца, быў парушэньнем выбарчага заканадаўства.
Пра гэта заявіла старшыня Цэнтравыбаркаму Лідзія Ярмошына 29 ліпеня на прэс-канфэрэнцыі ў Менску.
«Якія музыкі? Зараз збор подпісаў ідзе, ніякай агітацыі. Ніякіх музыкаў не павінна там быць. А вы кажаце пра тое, што там ужо вялася актыўная перадвыбарная агітацыя. Давайце мухі і катлеты разьмяжоўваць. Збор подпісаў — гэта адно, а музыка, прамовы ў мэгафон доўгія, гучныя — гэта зусім розныя рэчы», — сказала яна, паведамляе БелаПАН.
