Міністэрства адукацыі ЗША заявіла, што замарожвае гранты на больш за 2,2 мільярда даляраў і кантракты на 60 мільёнаў даляраў для Гарвардзкага ўнівэрсытэту. Гэта адбылося пасьля таго, як навучальная ўстанова адхіліла патрабаваньні Белага дому, накіраваныя, як заяўлялася, на барацьбу з антысэмітызмам.
У паведамленьні на сайце Міністэрства адукацыі ЗША гаворыцца, што Аб’яднаная мэтавая група барацьбы з антысэмітызмам «абʼяўляе пра замарожваньне 2,2 мільярда даляраў доўгатэрміновых грантаў і 60 мільёнаў даляраў доўгатэрміновых кантрактаў для Гарвардзкага ўнівэрсытэту».
«Парушэньне навучальнага працэсу, ад якога цярпяць кампусы ў апошнія гады, непрымальнае. Уціскі габрэйскіх студэнтаў недапушчальныя. Элітным унівэрсытэтам час сурʼёзна паставіцца да гэтай праблемы і ўзяць на сябе абавязак істотных зьменаў, калі яны хочуць надалей мець падтрымку падаткаплатнікаў», — адзначаецца ў заяве.
На мінулым тыдні Белы дом адправіў у Гарвард сьпіс патрабаваньняў, сярод якіх прызначэньне фэдэральнага нагляду за ўнівэрсытэтам прынамсі да 2028 году, аўдыт сыстэмы прыёму замежных студэнтаў, спыненьне ўсіх праграмаў і правілаў, зьвязаных з разнастайнасьцю, роўнасьцю і інклюзіяй.
Як піша AP, акрамя таго, патрабаваньні адміністрацыі Трампа да Гарварду ўключалі заклікі праверыць унівэрсытэт, яго выкладчыкаў і кіраўніцтва наконт іх поглядаў на разнастайнасьць, забараніць нашэньне масак на тэрыторыі кампусу. Як мяркуюць журналісты, апошняе патрабаваньне было накіраванае супраць прапалестынскіх пратэстоўцаў.
З свайго боку прэзыдэнт Гарвардзкага ўнівэрсытэту Алан Гарбэр заявіў, што ўнівэрсытэт ня пойдзе насустрач патрабаваньням ураду.
«Унівэрсытэт не адступіцца ад сваёй незалежнасьці і не адмовіцца ад сваіх канстытуцыйных правоў», — заявіў Гарбэр.
У навучальнай установе лічаць, што такім чынам Белы дом спрабуе кантраляваць унівэрсытэцкую супольнасьць.
Гарвард стаў першай элітнай ВНУ, якая адкрыта адмовілася выконваць патрабаваньні адміністрацыі Трампа. У сакавіку фэдэральны ўрад ЗША скараціў фінансаваньне Калюмбійскага ўнівэрсытэту на 400 мільёнаў даляраў. Прадстаўнікі навучальнай установы паведамілі, што «вядуць актыўны дыялёг» з адміністрацыяй, спрабуючы вярнуць гэтыя сродкі.
Раней прэзыдэнт ЗША Дональд Трамп абвінаваціў вядучыя ўнівэрсытэты краіны ў няздольнасьці абараніць студэнтаў габрэйскага паходжаньня падчас прапалестынскіх пратэстаў, а таксама ў росьце праяваў антысэмітызму ў студэнцкім асяродзьдзі.
Форум