Украінскія экспэрты ўключылі сытуацыю на ўкраінска-беларускай мяжы ў пералік пагроз нацыянальнай бясьпецы Ўкраіны.
«Там таксама існуюць пагрозы, хоць гэтая лінія не пазначаная на мапах як лінія фронту, але там Украіна вымушана трымаць пэўныя рэзэрвы», — сказаў Аляксей Мельнік, судырэктар праграм зьнешняй палітыкі і міжнароднай бясьпекі Цэнтру Разумкова, які разам з фондам «Дэмакратычныя ініцыятывы» падрыхтаваў даклад «Пагрозы нацбясьпецы і абаронныя трэнды ва Ўкраіне: аналітычны агляд тэндэнцый трэцяга кварталу 2024 году».
У той жа час, паводле яго, на падставе наяўнай інфармацыі аб сытуацыі на мяжы пакуль малаімаверны новы наступ з боку Беларусі.
«У прынцыпе, такой рэальнай пагрозы ўварваньня з тэрыторыі Беларусі на найбліжэйшую пэрспэктыву няма, а задача, якую выконвае беларускі дыктатар — гэта тое, каб садзейнічаць адцягваньню ўкраінскіх сіл для блякаваньня беларускай мяжы», — мяркуе ён.
Аляксей Мельнік нагадаў, што ў канцы жніўня з гэтай нагоды адбылася «афіцыйная камунікацыя» паміж Міністэрствам замежных спраў Украіны і Беларусьсю аб нядружных дзеяньнях беларускага боку.
«Гэта адзін з інструмэнтаў, які выкарыстоўваецца ў дадатак да таго, што там утрымліваецца наш істотны вайсковы кантынгент», — дадаў экспэрт.
Паводле экспэрта, у цэлым характар вайны за апошні час не зьмяніўся і Ўкраіна вымушана весьці вайну ва ўмовах шэрагу пераваг расейскай арміі.
«Моцным бокам праціўніка дагэтуль застаецца ня толькі колькасная перавага ў жывой сіле, а і неймаверна высокі ўзровень парог цярплівасьці [Расеі] да стратаў. Перавага ў сродках агнявога пацэльваньня таксама мае як колькасны характар — гэта артылерыя, КАБы, так і якасныя, найперш, у ракетна-авіяцыйным складніку», — адзначыў ён.
У сваю чаргу прадстаўнік Фонду «Дэмакратычныя ініцыятывы», аналітык у сфэры бясьпекі Тарас Жаўтэнка дадаў, што Расея навязвае Ўкраіне вайну на «зьнясіленьне».
«Колькасную перавагу, вядома перабіць вельмі складана. Адзіны спосаб зьмяніць балянс — гэта агнявая магутнасьць, агнявая перавага з нашага боку. Але гэта не вырашае праблему стратэгічна. [...] Мы павінны паставіць свайго праціўніка ў такія ўмовы, калі сытуацыя на полі бою створыць максымальнае напружаньне ўнутры Расеі», — сказаў Тарас Жаўтэнка.
Прэзыдэнт Украіны Ўладзімір Зяленскі 16 кастрычніка прадставіў дэпутатам Вярхоўнай Рады плян перамогі ў вайне з Расеяй зь пяці пунктаў, першы зь якіх — неадкладнае запрашэньне Ўкраіны ў NATO.
Некалькі дзён таму расейцы аднавілі тактычныя наступальныя атакі на мяжы Данецкай і Запароскай абласьцей, але ў Генэральным штабе Ўзброеных сіл Украіны не прызналі, што ў гэтай апэрацыйнай зоне расейцы прарвалі ўкраінскую абарону.
Форум