Чэхія выдаткавала больш за 7 мільярдаў эўра на расейскую нафту і газ. Гэта больш чым у пяць разоў перавышае суму ў 1,29 млрд эўра, якую яна дала Ўкраіне ў якасьці ваеннай дапамогі, паведамляе эўрапейскі Цэнтар вывучэньня дэмакратыі, які базуецца ў Баўгарыі.
Пасьля пачатку поўнамаштабнага ўварваньня Расеі ва Ўкраіну Чэхія, Вугоршчына і Славакія як краіны бяз выхаду да мора дамагліся выключэньня з эўрапейскага эмбарга на расейскую нафту. Гэта павінна было даць ім час для стварэньня новых маршрутаў паставак, аднак у Чэхіі гэтая шчыліна дазволіла адзінаму перапрацоўшчыку нафты ў краіне Orlen Unipetrol зарабіць на расейскіх энэрганосьбітах каля 1,2 млрд эўра звышпрыбытку, гаворыцца ў публікацыі. Гэта тлумачыцца тым, што ў 2023 годзе расейская нафта ў сярэднім была на 21% таньнейшай, чым паліва з Азэрбайджану.
Імпарт нафты ў Чэхію прынёс Крамлю больш за 2,3 мільярды эўра падатковых паступленьняў з пачатку ўварваньня Расеі ва Ўкраіну, адзначаюць аналітыкі цэнтру.
У 2023 годзе залежнасьць Чэхіі ад расейскай нафты вырасла да 60%, да 2024 году яна зьнізілася да 50%.
Аналітыкі Цэнтру вывучэньня дэмакратыі лічаць, што Чэхія можа цалкам замяніць пастаўкі расейскай нафты за кошт рэзэрвовых магутнасьцяў Трансальпійскага нафтаправода, павелічэньня імпарту нафтапрадуктаў зь Нямеччыны і выкарыстаньня значных запасаў нафты ў краіне.
У Міністэрстве прамысловасьці Чэхіі заявілі, што працуюць над гэтым, аднак «урад ня мае прамога кантролю над рашэньнямі прыватнага бізнэсу», маючы на ўвазе Orlen.
У кампаніі Orlen заявілі, што выконваюць усе законы і рыхтуюцца да поўнага пераходу на нерасейскую нафту.
Форум