«Ніхон Хіданкё» — гэта масавы рух тых, хто перажыў атамнае бамбаваньне Хіросімы і Нагасакі, таксама вядомых як хібакуся.
Арганізацыя атрымлівае Нобэлеўскую прэмію міру за намаганьні дзеля стварэньні сьвету, свабоднага ад ядзернай зброі, і за дэманстрацыю праз паказаньні сьведак таго, што ядзерная зброя ніколі не павінна быць выкарыстаная зноў.
Ядзерныя пагрозы
Штогадовыя вучэньні NATO ў абароне тэрыторыі альянсу ад нападу з выкарыстаньнем ядзернай зброі пад назвай Steadfast Noon («Устойлівы поўдзень») пачнуцца 14 кастрычніка.
Як паведаміла выданьне dw.com, генэральны сакратар NATO Марк Рутэ абвясьціў 10 кастрычніка ў Лёндане, што ў вучэньнях задзейнічаюць больш за 60 самалётаў.
Сёлетнія вучэньні пачнуцца празь некалькі тыдняў пасьля таго, як Уладзімір Пуцін абвясьціў аб зьменах у ядзернай дактрыне Расеі, што назіральнікі ў значнай ступені расцанілі як яшчэ адну спробу падарваць падтрымку Ўкраіны заходнімі саюзьнікамі, у тым ліку дазвол на нанясенне ўдараў у глыб Расеі.
Сярод іншага, у канцы верасьня Пуцін заявіў, што напад на Расею з боку любой бязьядзернай дзяржавы пры падтрымцы ядзернай дзяржавы будзе разглядацца як іх сумесная атака і можа выклікаць ядзерны адказ Масквы.
Верагодна, гэтая пагроза «істотна зьнізіла парог магчымага выкарыстаньня ядзернага арсэналу Расеі», адзначае агенцтва Associated Press. Аднак ніякіх рэальных зьменаў у ядзернай пазыцыі Масквы NATO пакуль не назірае, дадае агенцтва.
У прыватнасьці, пры ўступленьні на пасаду 1 кастрычніка Рутэ адзначыў, што няма доказаў якой-небудзь непасрэднай пагрозы выкарыстаньня ядзернай зброі, нягледзячы на «неабдуманую і безадказную» ядзерную рыторыку Пуціна.
Гаворачы аб сваім ядзерным арсенале, Рутэ адзначыў, што Пуцін «хоча, каб мы абмяркоўвалі і яго ядзерны арсэнал, і я думаю, што мы не павінны гэтага рабіць», цытуе АР.
Раней Уладзімір Пуцін і Аляксандар Лукашэнка заяўлялі, што перавялі ў Беларусь расейскую тактычную зброю.
Летась ляўрэаткай прэміі стала зьняволеная праваабаронца Наргес Мухамадзі з Ірану.
У 2022 годзе прэмію атрымалі зьняволены беларускі праваабаронца Алесь Бяляцкі, расейская праваабарончая група «Мемориал» і ўкраінская праваабарончая арганізацыя «Центр громадянських свобод».
Прэмія міру — адзіная з Нобэлеўскіх прэмій, якая ўручаецца ў Осла, а не ў Стакгольме. За гэты тыдзень былі абвешчаныя прэміі ў мэдыцыне, фізыцы, хіміі і літаратуры. Ляўрэатаў прэміі ў эканоміцы абвесьцяць у панядзелак.
Каму дасталіся іншыя прэміі
Прэмію ў мэдыцыне ў панядзелак атрымалі Віктар Амброс і Гэры Раўкун, іх узнагародзілі за адкрыцьцё драбнюткіх кавалачкаў генэтычнага матэрыялу, якія служаць спалучальнікамі ўнутры клетак і дапамагаюць кантраляваць працэсы ў клетках арганізму. Калі навукоўцы змогуць лепш зразумець, як яны працуюць і як імі маніпуляваць, гэта можа прывесьці да стварэньня магутных мэтадаў лячэньня такіх захворваньняў, як рак.
У аўторак прэмію ў фізыцы прысудзілі Джону Гопфілду з Прынстанскага ўнівэрсытэту (ЗША) і Джэфры Гінтану з Унівэрсытэту Таронта (Канада). «За асноватворныя дасьледаваньні і вынаходзтвы, якія ўключалі машыннае навучаньне з дапамогай штучных нэўронавых сетак». Гопфілд стварыў асацыятыўную памяць, якая можа захоўваць і аднаўляць выявы і іншыя тыпы дадзеных. Гінтан вынайшаў мэтад, які можа аўтаномна знаходзіць уласьцівасьці ў дадзеных і выконваць такія задачы, як ідэнтыфікацыя канкрэтных элемэнтаў на фатаграфіях.
У сераду ўручылі прэмію ў хіміі. Яе атрымалі Дэйвід Бэйкер (вашынгтонскі ўнівэрсытэт у Сіетле, ЗША) і супрацоўнікі Google Deepmind Дэміс Хасабіс і Джон Джампэр. У 2003 годзе Бэйкер распрацаваў новы бялок, і з таго часу ягоная дасьледчая група стварала адно за адным бялковыя ўтварэньні, у тым ліку бялкі, якія можна выкарыстоўваць у фармацэўтычных прэпаратах, вакцынах, нанаматэрыялах і малюсенькіх датчыках, паведаміў Нобэлеўскі камітэт. Хасабіс і Джампэр стварылі мадэль штучнага інтэлекту, якая змагла прадказаць структуру практычна ўсіх 200 мільёнаў бялкоў, якія ідэнтыфікавалі дасьледнікі.
10 кастрычніка ў Швэцыі назвалі ўладальніка Нобэлеўскай прэміі ў галіне літаратуры 2024 году. Узнагароду атрымала карэйская пісьменьніца Хан Ган за раман «Вэгетарыянка», у якім рашэньне жанчыны перастаць есьці мяса мела разбуральныя наступствы.
Хан Ган першая прадстаўніца Карэі, якая стала набэлянткай.
- Ляўрэатаў запрашаюць атрымаць узнагароды на цырымоніі 10 сьнежня, у гадавіну сьмерці Нобэля. Прэстыжная прэмія міру ўручаецца ў Осла, згодна зь ягоным жаданьнем, а іншыя цырымоніі ўзнагароджаньня праходзіць у Стакгольме.
- Прэмія прадугледжвае грашовую ўзнагароду ў памеры 11 мільёнаў швэдзкіх кронаў (1 мільён даляраў) са спадчыны стваральніка прэміі, швэдзкага вынаходніка Альфрэда Нобэля. Яна прысуджалася 117 разоў. Ляўрэатаў запрашаюць атрымаць узнагароды на цырымоніі 10 сьнежня, у гадавіну сьмерці Нобэля.
- Сярод грамадзян Беларусі ёсьць двое нобэлеўскіх ляўрэатаў: Сьвятлана Алексіевіч (прэмія ў літаратуры 2015 году) і Алесь Бяляцкі (прэмія міру 2022 году).
Форум