У трох рэгіёнах Расеі — Краснадарскім краі, Бранскай і Растоўскай вобласьцях — у ноч на 9 кастрычніка працавала супрацьпаветраная абарона.
Пад Бранскам украінскія дроны пацэлілі ў склад боепрыпасаў. Губэрнатар Бранскай вобласьці Аляксандар Багамаз паведаміў, што расейская СПА зьбіла над рэгіёнам 24 бесьпілётнікі.
Кіраўнік расейскага рэгіёну пераконваў у сваім Telegram-канале, што пацярпелых і разбурэньняў няма, але на месцах працавалі апэратыўныя і тэрміновыя службы.
Аднак ужо раніцай Міністэрства надзвычайных сытуацыяў Расеі абвясьціла «надзвычайную сытуацыю» у Карачаўскім раёне Бранскай вобласьці праз дэтанацыю выбуховых прадметаў.
Паводле адкрытых крыніц інфармацыі, каля Карачава знаходзіцца 67-ы арсэнал з рознымі боепрыпасамі галоўнага ракетна-артылерыйскага ўпраўленьня Міністэрства абароны Расеі. Ягоная плошча перад інцыдэнтам складала прыблізна 3,5 кв. км.
18 верасьня ўкраінскія вайскоўцы нанесьлі ўдар па складзе з боепрыпасамі ў горадзе Таропец Цьверскай вобласьці Расеі. Там захоўваліся ракеты для комплексаў «Искандер», апэратыўна-тактычныя ракетныя комплексы «Точка-У», зэнітныя ракеты і артылерыйскія боепрыпасы. Паведамлялі таксама, што перад атакай туды пасьля рамонтна-тэхнічнага абслугоўваньня былі прывезьлі ракеты зь Беларусі.
У акупаваным Крыме далей змагаюцца з пажарам у Феадосіі
Расейская адміністрацыя акупаванага Крыму паведаміла 9 кастрычніка, што зь месца надзвычайнай сытуацыі ў Феадосіі эвакуавалі 1129 чалавек.
«Захады для ліквідацыі надзвычайнай сытуацыі тэхнагеннага характару працягваюцца. Камісія ацэнкі нанесеных стратаў працягвае сваю працу», — паведамілі расейскія ўлады акупаванага Крыму.
Як адзначаюць спэцыялісты, пажар на нафтабазе можна патушыць толькі пасьля выгараньня ўсяго паліва.
Журналісты Расейскай службы Радыё Свабода апублікавалі спадарожнікавыя фота месца надзвычайнай сытуацыі, датаваныя 8 кастрычніка. На той момант полымя ахапіла ня менш за 10 рэзэрвуараў з палівам. Пазьней відавочцы паведамілі, што пажар перакінуўся на іншыя рэзэрвуары, якія ў выніку выбухнулі.
Расея атакавала Ўкраіну ракетамі і дронамі
У апэратыўным камандаваньні Паветраных сіл Украіны паведамілі, што Расея атакавала ўкраінскія гарады трыма ракетамі «Искандер» з Курскай вобласьці і 22 ударнымі дронамі з тэрыторыі Расеі і акупаванага Крыму.
«У выніку супрацьпаветранага бою зьбілі 21 варожы БпЛА ў Адэскай, Віньніцкай і Кіеўскай вобласьцях. Яшчэ адзін бесьпілётнік павярнуў у кірунку Расеі», — адзначаецца ў паведамленьні.
Як паведамілі ўлады Ўкраіны, расейцы атакуюць Адэскую вобласьць трэці дзень запар. Украінскія вайскоўцы зьбілі большасьць дронаў, але ў выніку атакі 5 чалавек атрымалі раненьні, тры зь іх — шпіталізавалі. Пацярпеў жылы сэктар і адна з мэдычных установаў.
У Палтаўскай вобласьці ў выніку ракетнага абстрэлу пацярпеў прамысловы аб’ект. Паводле папярэдняй інфармацыі, абышлося без пацярпелых.
Улады Кіеўскай і Віньніцкай вобласьцяў пакуль не паведамілі аб маштабах разбурэньняў і пацярпелых ад расейскай атакі дронамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум