Кандыдат ад Рэспубліканскай партыі на пасаду прэзыдэнта ЗША Дональд Трамп заявіў, што зможа хутка завяршыць вайну пасьля сваёй перамогі на выбарах.
Як паведаміла Ўкраінская служба Радыё Свабода з спасылкай на агенцтва Reuters, сустрэча Ўладзіміра Зяленскага і Дональда Трампа праходзіць у Нью-Ёрку.
«У нас вельмі добрыя дачыненьні [зь Зяленскім], і ў мяне таксама вельмі добрыя дачыненьні, як вы ведаеце, з прэзыдэнтам Пуціным. І я мяркую, калі мы пераможам, я мяркую, што мы вырашым гэтае пытаньне вельмі хутка», — сказаў Дональд Трамп.
Украінскае выданьне «Європейська правда» паведаміла, што на выказваньне Трампа пра дачыненьні з Пуціным Зяленскі сказаў: «Я спадзяюся, што ў нас лепшыя дачыненьні». На гэта Трамп адказаў прыказкаю: «Для танга патрэбныя двое».
«Сёньня ў нас будзе добрая сустрэча. Я мяркую, той факт, што мы сёньня сабраліся, — добры знак», — сказаў кандыдат ад Рэспубліканскай партыі на пасаду прэзыдэнта ЗША.
У этэры ўсеўкраінскага тэлемаратону паведамілі, што першапачаткова не плянавалася брыфінгаў для журналістаў пасьля гэтай сустрэчы, але перад яе пачаткам журналісты з дазволу Дональда Трампа змаглі задаць два пытаньні.
Пазьней Украінская служба Радыё Свабода ўдакладніла, што сустрэча працягвалася каля 40 хвілін.
Уладзімір Зяленскі заявіў, што патрэбны ціск на прэзыдэнт Расеі Ўладзіміра Пуціна.
«Мы павінны зрабіць усё, каб націснуць на яго, каб ён спыніў гэтую вайну. Ён на нашай тэрыторыі. Гэта найважней зразумець. Ён на нашай тэрыторыі», — сказаў прэзыдэнт Украіны.
У размове з Fox News пасьля сустрэчы Дональд Трамп сказаў: «Мы абодва хочам, каб гэта закончылася. І мы абодва хочам, каб была дасягнута справядлівая дамоўленасьць. Яна павінна быць справядлівай. І я мяркую, што гэта адбудзецца ў патрэбны час».
Ні Трамп, ні Зяленскі публічна не патлумачылі дэталяў патэнцыйных дамоўленасьцяў.
26 верасьня ў Белым доме адбыліся перамовы прэзыдэнта Ўкраіны Зяленскага з амэрыканскім калегам Джо Байдэнам, а таксама віцэ-прэзыдэнтам ЗША і кандыдатам у прэзыдэнты ад Дэмакратычнай партыі Камалай Гарыс.
Раней у чацьвер, 26 верасьня, Уладзімір Зяленскі, які знаходзіцца зь візытам у ЗША, прыбыў у Капітолій, дзе яго віталі лідэр дэмакратычнай большасьці ў Сэнаце Чак Шумэр і лідэр рэспубліканскай меншасьці ў Сэнаце Мітч Макконэл. Пазьней Зяленскі паведаміў, што сустрэўся з двухпартыйнай дэлегацыяй Сэнату, каб абмеркаваць ключавыя пункты свайго пляну перамогі.
У сувязі з паездкай Зяленскага ў ЗША паведамлялася, што ён рыхтуецца прадставіць Байдэну і Гарыс так званы плян перамогі. Прадстаўнікі Зяленскага таксама казалі, што ён плянуе пабачыцца з Дональдам Трампам. Сам жа Трамп праз час пацьвердзіў, што сустрэча павінна адбыцца 27 верасьня. На гэтым тыдні Дональд Трамп абрынуўся на ўкраінскага лідэра з нападкамі. Ён сказаў, што ЗША «працягваюць даваць мільярды даляраў чалавеку, які адмаўляецца заключыць угоду», каб пакласьці канец вайне. Пасланьне палітыка-рэспубліканца супастаўляецца з расейскай прапагандай, якая сьцьвярджае, што кровапраліцьце падаўжае не агрэсія Масквы, а непрымірымасьць Кіева, адзначае AP.
Паводле дадзеных СМІ, «плян перамогі» Ўладзіміра Зяленскага зьмяшчае, сярод іншага, просьбу дазволіць Украіне наносіць удары па цэлях у глыбіні Расеі заходняй зброяй, а таксама фармальнае запрашэньне Ўкраіны ў NATO.
Шэраг СМІ пісалі, што ў адміністрацыі ЗША скептычна ставяцца прынамсі да часткі гэтага пляну, называючы яго проста пашыраным наборам патрабаваньняў, а не стратэгіяй. Афіцыйна Вашынгтон плян пакуль не камэнтаваў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум