Выданьне так апісвае атрыманыя кадры: вайскоўцы выходзяць і, хістаючыся, становяцца на сярэдзіну пыльнай дарожкі, потым становяцца на калені, паклаўшы рукі на галаву. Празь некалькі сэкундаў, як паказвае запіс украінскага бесьпілётніка, яны ляжаць тварам долу, нерухома, побач валяецца пыл.
Відэа, атрыманае эксклюзіўна CNN, зьнятае ў час баявых дзеяньняў у канцы жніўня каля гораду Пакроўск ва ўсходняй Украіне, паказвае пакараньне расейскімі войскамі трох украінцаў, якія здаліся пасьля таго, як іхная траншэя была захопленая.
Інцыдэнт, апісаны ўкраінскім чыноўнікам, які папрасіў не паведамляць некаторых падрабязнасьцяў, каб абараніць інфармацыю пра падразьдзел, зьяўляецца часткай схемы відавочных пакараньняў сьмерцю, якія сёлета, здаецца, павялічваюцца.
CNN атрымаў яшчэ адно відэа зь бесьпілётніка, таксама з Запароскай вобласьці, на якім відаць, як сёлета ў траўні каля вёскі Рабоціна, за якую ішлі баі, расейскія вайскоўцы загадалі тром украінскім легчы тварам долу пасьля таго, як захапілі іхную зямлянку. Выведка Ўкраіны перадала журналістам аўдыёзапісы перахопаў таго, што, паводле яе словаў, было загадам расейскага камандзіра, вядомага як «Турк», свайму падначаленаму на месцах «Малому» забіць палонных і апавясьціць яго пасьля выкананьня загаду.
Крыніцы ўкраінскай выведкі перадалі CNN сьпіс з 15 выпадкаў зь лістапада, большасьць зь якіх пацьвярджаецца відэа- і аўдыёперахопам бесьпілётнікаў, у якіх яны кажуць, што ўкраінскія вайскоўцы, якія здаліся, былі забітыя расейцамі на лініі фронту, замест таго каб быць забранымі ў палон.
Генэральны пракурор Украіны паведаміў, што ягонае ведамства расьсьледуе 28 падобных здарэньняў з пачатку вайны, у выніку якіх загінулі 62 украінскія вайскоўцы.
Націск Масквы на ўкраінскі стратэгічны вайсковы цэнтар Пакроўск працягваецца, нягледзячы на нядаўнія посьпехі Кіеву ў памежным з Расеяй Курскім рэгіёне. Гэта падаграе надзеі, што Крэмль будзе вымушаны перацягнуць войскі для абароны ўласных межаў. Але пакуль наступ расейцаў пад Пакроўскам ня спынены.
Генэральны пракурор Украіны Андрэй Косьцін сказаў, што дзеяньні расейцаў, паказаныя на відэазапісе, чарговы раз паказваюць, як агрэсары парушаюць законы вайны. Калі праціўнік стаіць бяз зброі, падняў рукі, паказвае, што здаецца ў палон, забойства яго лічыцца ваенным злачынствам. Падобныя выпадкі зафіксаваныя ўкраінскімі праваахоўнікамі ў розных частках дзяржавы.
Таксама вядома, што некаторыя выпадкі падобнай экзэкуцыі ўкраінцаў сталі аб’ектам расьсьледаваньня з боку ААН. Іх могуць прызнаць злачынствамі супраць чалавечнасьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум