У Францыі Дурава падазраюць у 12 злачынствах. Справу супраць яго завялі яшчэ 8 ліпеня

У прэсавым рэлізе ведамства гаворыцца, што Дурава падазраюць у наступных 12 злачынствах:

• Саўдзел у адміністраваньні онлайн-плятформы для правядзеньня незаконных зьдзелак арганізаваных груп;
• Адмова перадаць на запыты праваахоўных органаў інфармацыю або дакумэнты, неабходныя для расьсьледаваньня;
• Саўдзел у захоўваньні парнаграфічнага кантэнту зь непаўналетнімі;
• Саўдзел у распаўсюджваньні такога кантэнту;
• Саўдзел у распаўсюджваньні і захоўваньні наркотыкаў;
• Саўдзел у кібэрзлачынствах;
• Саўдзел у махлярстве ў складзе арганізаванай злачыннай групоўкі;
• Злачынная змова з мэтай учыненьня цяжкага злачынства;
• Адмываньне грошай;
• Аказаньне крыпталягічных паслуг без ліцэнзіі;
• Пастаўка крыпталягічнага абсталяваньня без папярэдняга дэкляраваньня;
• Імпарт такога абсталяваньня.

У паведамленьні пракуратуры гаворыцца, што справу супарць Дурава завялі яшчэ 8 ліпеня 2024 году.

Павел Дураў застанецца пад вартай як мінімум да 28 жніўня.

ГЛЯДЗІЦЕ ТАКСАМА:

«Гэта не палітычнае рашэньне». Эманюэль Макрон зрабіў заяву пра затрыманьне Паўла Дурава

Інфармацыйнае агенцтва Reuters паведамляе са спасылкай на прадстаўніка паліцыі Францыі, што Дурава абвінавачваюць у патураньні фінансавым і кібэрнэтычным злачынствам, якія ўчыняюцца з дапамогай мэсэнджара Telegram.

Крыніцы Reuters у францускай паліцыі сьведчылі, што папярэдняе расьсьледаваньне ў дачыненьні да заснавальніка Telegram было распачатае таму, што ён адмовіўся супрацоўнічаць з праваахоўнымі органамі, а на ягонай плятформе не было мадэрацыі.

Паводле крыніцаў агенцтва, гэта прывяло да таго, што Дураў дапусьціў учыненьне «шырокага спэктру злачынстваў» з дапамогай мэсэнджара.

ГЛЯДЗІЦЕ ТАКСАМА:

«Наўрад ці Telegram закрыюць ці ён будзе ламацца». Чаго чакаць ад арышту Дурава карыстальнікам мэсэнджара