Да сакавіка 2025 году палітвязьня Ўладзімера Гундара пазбавілі харчовых перадач. Пра гэта стала вядома ад крыніцы, дасьведчанай ў справах палітвязьня.
Прычыны накладзенага спагнаньня крыніцы невядомыя. Пры гэтым Уладзімеру Гундару, які мае інваліднасьць, дазволілі атрымаць медычную бандэроль, якую сваякі адправілі яшчэ ў ліпені.
Крыніца падзялілася вытрымкай з апошняга ліста Ўладзімера Гундара.
«Я вельмі шчасьлівы чалавек... Шлях жыцьцёвы я сам выбраў, таму на лёс не наракаю, бо я чалавек цьвёрдай і свабоднай волі, якую Бог мне падараваў. І Ён па жыцьці мяне вядзе да вызначанай мэты Духам волі — да Ісьціны», — напісаў родным палітвязень Уладзімер Гундар.
Фігурант справы Мікалая Аутуховіча аб тэрарызме Ўладзімер Гундар асуджаны на 20 гадоў зьняволеньня паводле шэрагу абвінавачаньняў, але абвінавачаньне ў тэрарызме зь яго было зьнятае.
Уладзімеру Гундару 64 гады, адбыцьцё вялікага тэрміну для яго ўскладняецца тым, што ў яго няма адной нагі, ампутаванай вышэй калёна праз цяжкае захворваньне сасудаў.
Пры гэтым на стан здароўя палітвязень не наракае.
«Ён рады кожнай прагулцы і захапляецца цяперашнім надвор’ем. Пра цяпло піша з імпэтам, сьпякота яго не турбуе, ён ёй рады», — распавяла крыніца Свабоды, што пісаў Уладізмер Гундар у апошнім лісьце на волю.
Трымаюць палітвязьня ў турме № 4 у Магілёве.
Форум