Штомесячны праязны білет на ўсе віды транспарту стане дармовым для сваякоў ахвяраў трагедыі на Нямізе. Адпаведную пастанову апублікавалі на Нацыянальным праўным інтэрнэт-партале 8 жніўня.
Такую ж паслугу прадугледзелі і для «сямейнікаў загінулых у выніку акту тэрарызму на станцыі мэтро „Кастрычніцкая“».
Гэтыя льготы пашыраюцца толькі на сваякоў «зь ліку непрацоўных пажылых бацькоў, а таксама сужэнцаў, якія не ўзялі новы шлюб».
Дагэтуль для сямейнікаў ахвяраў трагедыяў на «Нямізе» і «Кастрычніцкай» улады Менску прадугледжвалі штогадовую выплату на куплю кветак для наведваньня месцаў пахаваньняў у 30 рублёў і на пакрыцьцё выдаткаў на рамонт надмагільных помнікаў у памеры, ня большым за пяць бюджэтаў пражытковага мінімуму, што дзейнічае на дату падачы заявы. Сёньня пяць такіх бюджэтаў — гэта 2093,65 рубля.
Рашэньне ўвайшло ў сілу пасьля афіцыйнага апублікаваньня.
25 гадоў таму, 30 траўня 1999 году, у цэнтры Менску каля Палацу спорту адбывалася сьвята піва. Надвор’е рэзка сапсавалася, тысячы людзей кінуліся да станцыі мэтро «Няміга». У цісканіне загінулі 53 чалавекі, у асноўным маладыя людзі, сотні атрымалі раненьні.
Выбух у менскім мэтро адбыўся 11 красавіка 2011 году ў 17.55 на станцыі «Кастрычніцкая». Загінулі 15 чалавек. Суд прызнаў вінаватымі двух мужчынаў, але хада працэсу, паказаньні і мэтады расьсьледаваньня выклікалі шмат пытаньняў як у староньніх назіральнікаў, так і ў сем’яў ахвяраў тэракту. Афіцыйнай вэрсіі падзеяў многія людзі не давяраюць.
Форум