Навіны палітвязьняў: журналіст Ігар Карней у калёніі працуе на пілараме

Журналіст Ігар Карней, якога накіравалі для адбыцьця пакараньня ў шклоўскую калёнію, прайшоў карантын і разьмеркаваны ў атрад.

«Зь ім усё нармальна, былі лісты і адзін званок. Вядома, што ён ужо працуе на пілараме», — паведаміла пра журналіста Ігара Карнея дасьведчаная крыніца.

Журналіст, былы карэспандэнт Радыё Свабода Ігар Карней быў затрыманы ў Менску роўна год таму, 17 ліпеня 2023-га.

22 сакавіка 2024 году Менскі гарадзкі суд прызнаў Ігара Карнея вінаватым паводле ч. 3 арт. 361-1 КК («Удзел у экстрэмісцкім фармаваньні») і пакараў 3 гадамі зьняволеньня і грашовым штрафам у памеры 20 тысяч рублёў.

Да суду Карнея трымалі ў менскім СІЗА на вуліцы Валадарскага, потым у магілёўскім СІЗА ён чакаў разгляду апэляцыйнай скаргі. Вярхоўны суд пакінуў прысуд журналісту бяз зьмены.

У чэрвені стала вядома, што Ігара Карнея для адбыцьця пакараньня перавялі ў папраўчую калёнію № 17 у Шклове. Вядома, што ў зьняволеньні ён шмат чытае і навучыўся гуляць у нарды, папулярную ў беларускіх вязьніцах настольную гульню.

«Чакаем ад яго званку і лістоў. Раней казаў, што на здароўе ня скардзіцца», — паведаміла крыніца пра Ігара Карнея.

Беларускія праваабаронцы прызналі Ігара Карнея палітзьняволеным.

ГЛЯДЗІЦЕ ТАКСАМА:

Гэмінгуэй, Стывэн Гокінг і Ўладзімер Караткевіч. Што журналіст Карней чытае на «Валадарцы» 

ГЛЯДЗІЦЕ ТАКСАМА:

Журналісту Ігару Карнею прысудзілі 3 гады калёніі і штраф 20 тысяч рублёў

ГЛЯДЗІЦЕ ТАКСАМА:

«Праз 3 гады пасьля падаўленьня пратэстаў працягваюць распраўляцца з журналістамі». БАЖ патрабуе вызваленьня Ігара Карнея і іншых калегаў