Разам зь ім звольніўся іншы беларус, Міхаіл Залеўскі.
Беларускія спэцыялісты Аляксандар Хацкевіч і Міхаіл Залеўскі пакінулі польскі футбольны клюб Zagłębia Sosnowiec, кантракты скасаваныя пры згодзе бакоў, паведаміла выданьне «Трыбуна».
Беларусы ўладкаваліся клюб у студзені. Хацкевіч займаў пасаду галоўнага трэнэра, Залеўскі — спартовага дырэктара.
Трэцяга красавіка агрэсіўна настроеныя фанаты «Заглембе» ўварваліся на трэніроўку клюбу і напалі на трэнэра Аляксандра Хацкевіча. Як паведаміў польскі спартовы партал Meczyki.pl, Хацкевічу нанесьлі ўдар у твар і яшчэ некалькі ўдараў нагамі. «Заглембе» займае апошняе месца ў другім дывізіёне чэмпіянату Польшчы. Свой апошні матч гэтая каманда прайграла зь лікам 0:4.
Хто такія Аляксандар Хацкевіч і Міхаіл Залеўскі
Аляксандар Хацкевіч пачынаў кар’еру ў менскім «Дынама», адкуль у 1996 годзе перайшоў у кіеўскае «Дынама», у якім гуляў да 2004 году, заваяваўшы ў складзе клюбу шмат трафэяў: сем разоў станавіўся чэмпіёнам Украіны і чатыры разы — уладальнікам Кубка Ўкраіны. Затым нядоўгі час выступаў за кітайскі «Цяньцзінь Тэда» і латвійскі клюб «Вента». Завяршаў кар’еру ў родным менскім «Дынама».
Трэнэрскую карʼеру пачаў у 2007 годзе ў якасьці трэнэра «Дынама» (Менск), потым узначальваў юнацкую зборную Беларусі U-18 і ФК «Віцебск». З 1 лютага 2010-га да красавіка 2011 года працаваў асыстэнтам галоўнага трэнэра нацыянальнай зборнай Украіны. У сьнежні 2010-га ўзначаліў моладзевую каманду кіеўскага «Дынама», а ўлетку 2013-га — «Дынама-2». 4 сьнежня 2014 году быў прызначаны галоўным трэнэрам нацыянальнай зборнай Беларусі, якую ўзначальваў да 6 сьнежня 2016 году.
Пасьля пачатку вайны, якую Хацкевіч застаў у Кіеве, ён неаднаразова выказваўся ў падтрымку Ўкраіны і асуджаў маўчаньне вядомых беларускіх спартоўцаў.
Міхаіл Залеўскі працаваў на пасадах намесьніка старшыні праўленьня ААТ «БНБ-Банк», гендырэктара ФК «БАТЭ Барысаў», адкуль звольніўся ў верасьні 2020-га на знак пратэсту. Пасьля супрацоўнічаў з БФСС у сфэры футболу, а таксама ў пытаньнях допуску беларускіх вольных спартоўцаў, дзяцей і аматараў да спаборніцтваў. Зьяўляецца чальцом Спэцыяльнай камісіі ў пытаньнях допуску грамадзян Беларусі і Расеі да спаборніцтваў на тэрыторыі Польшчы, створанай на рашэньне міністра спорту і турызму Польшчы.
У 2020 годзе ён апублікаваў у інстаграме відэа, як выкідае сваю афіцэрскую форму, пратэстуючы супраць гвалту сілавікоў.
У верасьні 2023 году Залеўскі стаў намесьнікам Паўла Латушкі ў Абʼяднаным пераходным кабінэце, ён адказвае за пытаньні санкцыйнай палітыкі ў спорце і ўдзелу беларускіх спартоўцаў у спаборніцтвах.
