Судзьдзя Дзьмітры Казлоў пакараў яго 2 гадамі і 6 месяцамі калёніі па двух артыкулах: «Паклёп у дачыненьні да Лукашэнкі», «Садзейнічаньне экстрэмісцкай дзейнасьці».
Андрэю Толчыну 64 гады, ён пакутуе на шэраг хранічных захворваньняў. Да 2020 году супрацоўнічаў зь незалежнымі СМІ Беларусі.
Быў затрыманы 27 верасьня 2023 году і з таго часу знаходзіўся ў гомельскім СІЗА. Як стала вядома Свабодзе, ягоны стан здароўя моцна пагоршыўся.
Андрэй Толчын даглядаў хворую сястру, якая памерла прыкладна за тыдзень-два да ягонага затрыманьня. Пракурор прасіў для яго 3 гады калёніі.
Судовы працэс над відэаапэратарам-фрылансэрам Андрэем Толчыным пачаўся 5 сакавіка ў Гомельскім абласным судзе.
Толчына затрымалі 23 верасьня 2023 году. На наступны дзень пасьля затрыманьня ў кватэры, дзе ён жыў з жонкай, правялі ператрус. Сьледчыя забралі кампутарную тэхніку ды іншыя лічбавыя носьбіты.
Паводле БАЖ, за кратамі цяпер 34 прадстаўнікі беларускіх СМІ.
Хто такі Андрэй Толчын
Андрэй Толчын у дэмакратычным асяродку Гомля стаў прыкметнай асобай яшчэ ў 90-х гадах, калі Беларусь здабывала незалежнасьць. Працаваў тады наладчыкам апаратуры на радыёзаводзе «Прамень».
Удзельнічаў у незалежным прафсаюзным руху, які выступаў за абарону правоў рабочых.
На дэмакратычнай аснове быў абраны дэпутатам Гомельскага гарадзкога савету 21-га скліканьня — гэта акурат той савет, адзін з двух у Беларусі, які ў жніўні 1991 году адкрыта выступіў супраць камуністычнага дзяржаўнага перавароту ў Маскве і вітаў абвяшчэньне незалежнасьці Рэспублікі Беларусь.
У гарадзкім савеце Андрэй уваходзіў у камісію сувязяў з грамадзкасьцю і СМІ. Быў сябрам зьліквідаванай цяпер уладамі Аб’яднанай грамадзянскай партыі, працяглы час ачольваў гарадзкую арганізацыю гэтай партыі. Апекаваўся дзейнасьцю дэмакратычных дабрачынных фондаў. Зьведаў таксама і беспрацоўе.
Пасьля выбараў 2010 году Толчын у якасьці відэаапэратара-фрылансэра супрацоўнічаў зь незалежнымі мэдыярэсурсамі. За журналісцкую працу Андрэя Толчына шмат разоў штрафавалі і адпраўлялі за краты на падставе адміністрацыйных пратаколаў, якія складала міліцыя, бо ў відэаапэратара-фрылансэра не было акрэдытацыі ў беларускім Міністэрстве замежных справаў.
У 2020 годзе Толчына затрымлівалі разам з журналісткай Ларысай Шчыраковай за асьвятленьне пратэстаў, афіцыйна — нібыта за ўдзел у масавых беспарадках.
Таксама журналіста затрымлівалі ў 2021 годзе каля гомельскага СІЗА-3, дзе ён здымаў сваякоў палітвязьняў Мікалая Статкевіча і Ігара Лосіка, якіх разам зь іншымі абвінавачанымі 24 чэрвеня пачалі судзіць у памяшканьні ізалятара. Суд праходзіў у закрытым рэжыме, палітвязьняў абвінавачвалі ў арганізацыі масавых беспарадкаў, распальваньні звады і перашкодзе дзейнасьці ЦВК. Тады Толчын запісваў і камэнтар аднаго з дыпляматаў Эўразьвязу, што прыехалі ў Гомель на суд. Усе відэазапісы ў фрылансэра забрала міліцыя.
