Міністар абароны Ізраілю Яаў Галант упершыню заклікаў прызываць ультраартадаксальных габрэяў у ЦАХАЛ, піша The Jerusalem Post.
«Сёньня існуе сапраўдная нацыянальная неабходнасьць падоўжыць тэрмін службы салдат і рэзэрвістаў, — сказаў Галант журналістам у Тэль-Авіве. — Калі нагрузка на тых, хто на службе, працягвае расьці, я ясна скажу адно: гэтая вайна даказала, што кожны павінен. Калі ня будзе дасягнуты шырокі кансэнсус, я ня буду ўносіць закон аб вайсковым абавязку на патрабаваньне Мінабароны».
Рух за якасны ўрад у Ізраілі (MQG), адзін з асноўных заяўнікаў, назваў умоўныя загады драматычным і важным крокам «на шляху да поўнай роўнасьці ў прызыве».
Раней у гэтым месяцы начальнік штабу ЦАХАЛу Герцы Галеві заявіў, што законы аб прызыве ў войска ў Ізраілі павінны зьмяніцца такім чынам, каб усіх чальцоў ізраільскага грамадзтва прызывалі абараняць краіну.
«У гэтыя складаныя часы адна рэч вельмі ясная — кожны павінен зрабіць свой унёсак, каб абараніць наш дом, — сказаў Халеві. — Гэта іншы час, і папярэднія рэаліі павінны быць перагледжаныя. Зараз мы прасоўваем рашэньні неадкладнага прызыву, каб папоўніць нашы шэрагі на тле баявых дзеяньняў, якія працягваюцца. Многае з таго спатрэбіцца ў будучыні».
Ізраіль працягвае вайну з рухам палестынскіх арабаў ХАМАС, прызнаным у шэрагу краін тэрарыстычнай арганізацыяй. Байцам ЦАХАЛу ўдалося зьнішчыць шмат тунэляў і штабоў, якія належалі ХАМАС, аднак вайсковае кіраўніцтва заяўляе, што баявыя дзеяньні трэба працягваць.
З пачатку вайны каля 66 тысяч ультраартадаксальных маладых людзей прызыўнога ўзросту былі вызваленыя ад службы з прычыны «вывучэньня Торы».
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
