Лінкі ўнівэрсальнага доступу

 
Лёндан увёў санкцыі супраць кіраўніцтва калёніі, дзе памёр Навальны. Узгадваем, ці ўводзілі санкцыі супраць начальнікаў турмаў Беларусі

Лёндан увёў санкцыі супраць кіраўніцтва калёніі, дзе памёр Навальны. Узгадваем, ці ўводзілі санкцыі супраць начальнікаў турмаў Беларусі


Вялікая Брытанія ўвяла санкцыі ў дачыненьні да кіраўніцтва калёніі, у якой памёр апазыцыйны палітык Аляксей Навальны. Паглядзелі, ці ўводзілі раней санкцыі супраць кіраўніцтва калёній і турмаў, дзе загінулі беларускія палітвязьні.

Вялікая Брытанія ўвяла санкцыі ў дачыненьні да кіраўніцтва папраўчай калёніі № 3 «Палярны воўк», у якой памёр апазыцыйны палітык Аляксей Навальны, паведамляецца на сайце брытанскага ўраду.

Начальніку калёніі Вадзіму Калініну і пяці ягоным намесьнікам забароняць уезд у Вялікую Брытанію і замарозяць іх актывы. Вялікая Брытанія стала першай краінай, якая ўвяла санкцыі ў адказ на сьмерць Навальнага.

Супраць кіраўніцтва якіх калёній Беларусі ўводзілі санкцыі

У сьнежні 2021 году ЗША ўвялі санкцыі адносна Ігара Кенюха і Яўгена Шапецькі — кіраўнікоў ізалятара часовага ўтрыманьня і цэнтру ізаляцыі правапарушальнікаў на Акрэсьціна ў Менску. Яны трапілі пад санкцыі «за датычнасьць да грубых парушэньняў правоў чалавека, а менавіта да катаваньняў і/або жорсткага, бесчалавечнага або прыніжальнага для годнасьці абыходжаньня з затрыманымі ў выніку сфальшаваных прэзыдэнцкіх выбараў 9 жніўня 2020 году».

У жніўні 2023 году Эўразьвяз увёў санкцыі супраць шэрагу цяперашніх і былых начальнікаў беларускіх папраўчых калёній, датычных да рэпрэсіяў супраць палітвязьняў:

  • Аляксандар Карніенка, былы начальнік папраўчай калёніі № 17 у Шклове, быў начальнікам гэтай калёніі на момант гібелі ў ёй палітвязьня Вітольда Ашурка;
  • Андрэй Пальчык, экс-начальнік папраўчай калёніі № 1 у Наваполацку;
  • Руслан Машадзіеў, начальнік папраўчай калёніі № 1 у Наваполацку;
  • Сяргей Карчэўскі, начальнік рэжымнай часткі папраўчай калёніі № 17 у Шклове, у якой памёр Вітольд Ашурак;
  • Сяргей Масьлюкоў, начальнік выхаваўчай калёніі ў Бабруйску;
  • Сьвятлана Паходава, начальніца жаночай папраўчай калёніі № 4 у Гомлі;
  • Яўген Бубіч, начальнік папраўчай калёніі № 2 у Бабруйску — пазьней, у лютым 2024 году, у гэтай калёніі памёр палітзьняволены грамадзкі актывіст і журналіст Ігар Леднік;
  • Юры Васілевіч, начальнік папраўчай калёніі № 14 у Навасадах.

Супраць кіраўніцтва калёніі № 3 «Віцьба», дзе памерлі палітвязьні Мікалай Клімовіч і Вадзім Храсько, а таксама супраць кіраўніцтва турмы № 1 у Горадні, дзе памёр палітзьняволены мастак Алесь Пушкін, санкцый пакуль ня ўводзілі.

Ігар Лосік Кацярына Андрэева Ірына Слаўнікава Марына Золатава
XS
SM
MD
LG