У Дзень правоў чалавека ЗША ўвялі адмысловыя санкцыі супраць кіраўнікоў Акрэсьціна

10 сьнежань 2021, 21:11

Як паведаміў сёньня дзяржсакратар ЗША Энтані Блінкен, у Міжнародны дзень правоў чалавека ЗША ўводзяць адмысловыя санкцыі супраць 12 службовых асобаў з розных краінаў, датычных да грубых парушэньняў правоў чалавека.

Пад санкцыі падпалі адзін угандзіец, чацьвёра кітайцаў, шэсьць банглядэшцаў, два шрылянкійцы, адзін мэксіканец. Таксама санкцыі ўжытыя адносна Ігара Кенюха і Яўгена Шапецькі, кіраўнікоў ізалятара часовага ўтрыманьня і цэнтру ізаляцыі правапарушальнікаў на Акрэсьціна ў Менску. Яны трапілі пад санкцыі «за датычнасьць да грубых парушэньняў правоў чалавека, а менавіта да катаваньняў і/або жорсткага, бесчалавечнага або прыніжальнага для годнасьці абыходжаньня з затрыманымі ў выніку сфальшаваных прэзыдэнцкіх выбараў 9 жніўня 2020 году».

Кенюх і Шапецька ўжо былі ў сьпісе асобаў, якія трапілі ў санкцыйны сьпіс ЗША ў жніўні 2021 году.

ГЛЯДЗІЦЕ ТАКСАМА:

ЗША абвясьцілі новыя санкцыі супраць рэжыму Лукашэнкі. СЬПІС

ГЛЯДЗІЦЕ ТАКСАМА:

ЗША, Эўразьвяз, Канада і Вялікая Брытанія ў супольнай заяве патлумачылі новыя санкцыі

У сваім звароце да Дня правоў чалавека Блінкен адзначыў: «Мы вітаем шчыльную каардынацыю з ЭЗ, Вялікай Брытаніяй і Канадай на мінулым тыдні ў дачыненьні да нашага наймацнейшага на сёньняшні дзень пакету санкцыяў у дачыненьні да Беларусі, які сумесна наносіць шкоду рэжыму Лукашэнкі за працяг рэпрэсіяў супраць беларускага народу. Злучаныя Штаты зь нецярпеньнем чакаюць працягу нашага партнэрства з саюзьнікамі і грамадзянскай супольнасьцю ў справе абароны правоў чалавека і прасоўваньня падсправаздачнасьці і добрага кіраваньня».

Што варта ведаць пра санкцыі ЗША

Першыя санкцыі, якія ўвяла адміністрацыя прэзыдэнта Джорджа Буша пасьля прэзыдэнцкіх выбараў у Беларусі ў 2006 годзе, прадугледжвалі блякаваньне ўласнасьці і актываў групы высокіх чыноўнікаў, уключна з Аляксандрам Лукашэнкам. Санкцыі распаўсюджваліся таксама і на сем’і гэтых чыноўнікаў. Ім таксама забаранілі ўезд на тэрыторыю ЗША.

Пазьней асобам, у тым ліку і новым, якія папоўнілі сьпісы, забаранілі мець актывы на тэрыторыі ЗША і весьці бізнэс з амэрыканскімі партнэрамі.

Пасьля прэзыдэнцкіх выбараў у Беларусі напрыканцы 2010 году ЗША пашырылі сьпіс беларускіх чыноўнікаў, якім забаронены ўезд у ЗША. Акрамя таго, грамадзянам ЗША забаранілі весьці бізнэс зь дзяржаўным канцэрнам «Белнафтахім» і шэрагам іншых прадпрыемстваў. Гэтак Злучаныя Штаты адрэагавалі на рэпрэсіі пасьля выбараў, у тым ліку на зьняволеньне шэрагу кандыдатаў у прэзыдэнты.

Пра якія беларускія прадпрыемствы ідзе гаворка

«Белнафтахім»,
«Белнафтахім ЗША»,
«Нафтан»,
«Беларускі нафтавы гандлёвы дом»,
«Белшына»,
«Гродна Азот»,
«Гроднахімвалакно»,
ААТ «Лякафарба»,
ААТ «Полацак-Шкловалакно».

Прадпрыемствам i грамадзянам ЗША было забаронена ўступаць у эканамічныя і фінансавыя дачыненьні з гэтымі арганізацыямі, а ўся іх маёмасьць і рахункі, якія знаходзяцца на тэрыторыі ЗША, былі замарожаныя. Да таго ж многія краіны і кампаніі адмаўляюцца працаваць з прадпрыемствамі, якія знаходзяцца пад санкцыямі ЗША.

У кастрычніку 2015 году Міністэрства фінансаў ЗША прыпыніла санкцыі супраць гэтых дзевяці беларускіх прадпрыемстваў у сувязі з «пэўным прагрэсам у сфэры дэмакратыі і правоў чалавека», а таксама з мэтай падтрымкі незалежнасьці і сувэрэнітэту Беларусі.
Пасьля прэзыдэнцкіх выбараў у Беларусі ў жніўні 2020 году і рэпрэсій, якія адбыліся пасьля іх, ЗША аднавілі санкцыі ад 3 чэрвеня 2021 году. Адпаведнае рашэньне 19 красавіка 2021 году апублікавала Міністэрства фінансаў ЗША. Злучаныя Штаты дабіваюцца вызваленьня ўсіх палітвязьняў.

MailChimp Newsletter - Stories of the week - Region Widget - Belarus (GR-2352) SHORT