Сярод затрыманых — карэспандэнты «Осторожно, новости», SotaVision, «Коммерсанта», France Press, Spiegel, а таксама праваабаронцы з руху «За правы чалавека», піша «Настоящее время».
Паводле зьвестак «ОВД-Инфо», у аўтазаку знаходзіліся 27 чалавек, усіх іх адвезьлі ў аддзяленьне паліцыі «Кітай-горад».
Па словах адной з удзельніц руху «Шлях дадому» Марыі Андрэевай, сярод затрыманых ёсьць і сваяк мабілізаванага. Яна паспрабавала перагарадзіць дарогу аўтазаку, але яе адціснулі паліцыянты. «Сирена» піша, што ў аўтазак адводзілі ўсіх, хто здымаў ускладаньне кветак да Вечнага агню.
Каля 11:45 па маскоўскім часе сталічная пракуратура апублікавала перасьцярогу для ўдзельнікаў «няўзгодненай акцыі» ў цэнтры горада, папярэджваючы, што «як арганізацыя няўзгодненага мерапрыемства, так і ўдзел у ім цягнуць за сабой устаноўленую расейскім заканадаўствам адказнасьць».
3 лютага ў Аляксандраўскім садзе ля сьценаў Крамля праходзіла акцыя руху жонак мабілізаваных, прымеркаваная да 500-га дня з пачатку мабілізацыі ў Расеі. Каля 100 удзельнікаў, сярод якіх былі і мужчыны, і жанчыны, прыйшлі з кветкамі і ўсклалі іх да магілы Невядомага салдата.
У Расеі ўсё больш жонак расейскіх вайскоўцаў, якія ваююць ва Ўкраіне, далучаецца да руху «Шлях дадому». Удзельніцы пратэсту, які пачаўся ў лістападзе 2023 году з адзінкавых акцый, стварылі адмысловы тэлеграм-канал і заклікаюць усіх жанчын, чыіх мужоў мабілізавалі ў войска на вайну ва Ўкраіну, далучацца да іх патрабаваньняў. Адно зь першых і галоўных патрабаваньняў руху — не спыненьне вайны, а ўвядзеньне абавязковай ратацыі мабілізаваных у армію з украінскага фронту.
- Больш за год таму ўлады Расеі аб’явілі так званую частковую мабілізацыю на вайну з Украінай. Паводле афіцыйных зьвестак, тады ў войска прызвалі каля 300 тысяч чалавек. Указ аб мабілізацыі працягвае дзейнічаць да гэтага часу.
- 12 сьнежня 2023 году Міністэрства абароны Расеі адмовілася абмежаваць тэрмін службы мабілізаваных адным годам і паведаміла, што прызваныя вайскоўцы будуць знаходзіцца на службе да заканчэньня вайны.
