Карпарацыя Sony абмежавала актывацыю відэагульняў у найбуйнейшай анлайн-краме кампутарных гульняў Steam на тэрыторыі Беларусі і Расеі, папярэдзіў расейскі выдавец і дыстрыбутар гульняў «Бука». Такую ж інфармацыю распаўсюдзіла папулярная гульнявая інтэрнэт-крама Steampay.
«Сёньня мы атрымалі інфармацыю ад выдавецтва Sony, што актывацыя іх гульняў зараз недаступная для Steam-акаўнтаў з рэгіёнамі Расеі і Беларусі. На жаль, гэта таксама тычыцца папярэдняй замовы Horizon Forbidden West, якая зьявілася ў продажы ўчора», — паведамілі ў Steampay.
На тэрыторыі астатніх краін СНД гульня актывуецца пасьпяхова.
Таксама стала вядома, што ключы для ПК-гульняў ад Sony больш ня будуць выпускацца спэцыяльна для рынку Беларусі і Расеі.
Пасьля пачатку поўнамаштабнай агрэсіі Расеі супраць Украіны Sony абмежавала набыцьцё сваіх гульняў для карыстальнікаў з Расеі і Беларусі, а таксама абмежавала краму PS Store на кансолях PlayStation.
