Расея абстрэльвае большую частку тэрыторыі Ўкраіны. Гэта найбуйнейшая атака за апошнія некалькі месяцаў.
Расея з ночы пачала наймацнейшую за апошнія некалькі месяцаў атаку супраць Украіны. Пад абстрэлам – Кіеў, Дніпро, Запарожжа, Харкаў, Львоў, Сумская вобласьць.
Вядома, што толькі па адным Харкаве расейцы запусьцілі 22 ракеты.
У Кіеве шмат пашкоджаньняў, ёсьць пацярпелыя
У Кіеве пад абстрэлам апынуліся чатыры раёны: тры ў цэнтры (Падольскі, Шаўчэнкаўскі і Сьвятошынскі) і адзін на левым беразе Дняпра (Дарніцкі).
Найбольш параненых у Падольскім раёне, дзе пасьля абстрэлу складу на 3 тысячах квадратных мэтраў пачаўся пажар. Экстраныя службы намагаюцца выратаваць пацярпелых.
Паводле мэра Кіева Віталя Клічко, папярэдне вядома пра 28 параненых (іх шпіталізавалі), тры чалавекі загінулі. Выратавальнікі шукаюць пад заваламі людзей.
Пашкоджаньні атрымаў будынак станцыі мэтро «Лук’янаўская», у іншых раёнах пацярпелі адзін недабудаваны і адзін заселены жылыя дамы.
Харкаў абстрэльвалі ракетамі С-300
У Харкаве загінулі тры чалавекі і 13 атрымалі раненьні.
Расея абстрэльвала горад у дзьве хвалі. У выніку абстрэлаў у горадзе зьнішчаныя і пашкоджаныя складзкія і вытворчыя памяшканьні, транспартнае дэпо. Адна ракета ўпала на тэрыторыю лякарні хуткай дапамогі, пашкоджаньні атрымаў аўтамабіль хуткай дапамогі.
Адначасова авіяцыйным ударам па абласным цэнтры расейцы інтэнсіўна абстрэльвалі з артылерыі больш за 15 населеных пунктаў вобласьці.
У Дніпры пашкоджаньні атрымаў радзільны дом
Улады Днепрапятроўскай вобласьці паведамілі, што, паводле папярэдніх ацэнак, у выніку ўдару па Дніпры пашкоджаньні атрымалі гандлёвы цэнтар, адзін прыватны і адзін шасьціпавярховы дом, а таксама радзільня.
Папярэдне, раненьні атрымалі 15 чалавек, чатыры загінулі.
У Львове абстралялі сацыяльную і жылую інфраструктуру
У Львове, як паведаміў мэр горада Андрэй Садавы, у выніку падзеньня аскепкаў дрона пашкоджаны аб’ект крытычнай інфраструктуры. Ёсьць пацэльваньні ракетамі ў жылыя дамы, пашкоджаньні атрымалі тры школы і адзін дзіцячы садок.
Улады паведамілі аб адным загінулым, 15 чалавек атрымалі раненьні.
У Адэсе двое загінулі і 15 атрымалі раненьні
Паводле ўладаў, сярод параненых двое дзяцей ва ўзросьце 6 і 8 гадоў.
Расейцы ўначы атакавалі Адэсу дронамі, а раніцай – ракетамі. Пад абстрэл трапілі жылыя дамы.
У рэгіёне ад абстрэлу пацярпеў закансэрваваны інфраструктурны аб’ект.
У Запарожжы пад абстрэлам жылы сэктар і прамысловасьць
Папярэдне ў Запарожжы загінуў адзін чалавек і 10 атрымалі раненьні. Расея наносіла ўдары па жылым сэктары і прадпрыемствах гораду.
Адна з ракет ударыла ў адкрытую мясцовасць, яшчэ адна зьнішчыла прыватны дом. Ад выбухавай хвалі пацярпела некалькі шматпавярховых будынкаў.
Улады ўдакладняюць маштабы руйнаваньняў. Папярэдне 4 чалавекі загінулі, 12 атрымалі раненьні.
Расея запусьціла па Ўкраіне 110 ракет
Прэзыдэнт Украіны Ўладзімір Зяленскі заявіў, што Расея атакавала ўсім, што мае ў сваім арсэнале.
«„Кінжалы“, С-300, крылатыя ракеты, бесьпілётнікі. Стратэгічныя бамбавальнікі запускалі Х-101/Х-505. Прыблізна 110 ракет запусьцілі, большую частку зьбілі», – паведаміў Уладзімір Зяленскі.
Украінскі прэзыдэнт выказаў спачуваньні сваякам і блізкім загінулых.
«Ма абавязкова адкажам тэрарыстам на іхныя ўдары. І мы будзем змагацца, каб гарантаваць бясьпеку сваёй краіне, кожнаму гораду, усяму нашаму народу. Расейскі тэрор павінен прайграць. Менавіта так і будзе», – заявіў прэзыдэнт Украіны.
Пазьней у апэратыўным камандаваньні Паветраных сіл Украіны ўдакладнілі, што сродкі супрацьпаветранай абароны зьбілі 114 са 158 паветраных цэляў, у тым ліку 87 ракет і 27 дронаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
