Расейскі суд у чацьвер прысудзіў пратэстоўку да 7 гадоў пазбаўленьня волі за тое, што яна замяняла цэтлікі ў прадуктовай краме на антываенныя налепкі. Гэта стала чарговым наступам на іншадумства ў краіне, якая сутыкаецца з моцнай міжнароднай рэакцыяй за працяг уварваньня ва Ўкраіну, піша Голас Амэрыкі.
«Расейскія войскі разбамбілі школу мастацтваў у Марыюпалі. У ёй хаваліся ад абстрэлаў каля 400 чалавек», — было напісана на адной з налепак. «Ва Ўкраіну адпраўляюць расейскіх салдатаў тэрміновай службы. Цана гэтай вайны — жыцьцё нашых дзяцей», — гаварылася на іншай.
Пакупнік у супэрмаркеце апавясьціў паліцыю, якая неадкладна арыштавала Сашу Скачыленку. Арышт адбыўся прыкладна празь месяц пасьля таго, як уступіў у сілу закон, які забараняе публічныя дэманстрацыі супраць вайны.
33-гадовая Скачыленка не адзіная пацыфістка, пакараная ўладамі. Закон ужыты супраць шырокага кола іншадумцаў, ад апазыцыйных палітыкаў і праваабаронцаў да простых расейцаў.
Каля 19 834 расейцаў былі арыштаваныя за свае палітычныя перакананьні з 24 лютага 2022 году, калі Масква пачала поўнамаштабнае ўварваньне ва Ўкраіну, па кастрычнік 2023 году, паведамляе праваабарончая група OVD-Info, якая займаецца маніторынгам палітычных арыштаў.
Скачыленка не адмаўляла абмену цэтлікаў на антываенную інфармацыю, але адмаўляла абвінавачаньне ў тым, што сьвядома спрабавала ўвесьці грамадзкасьць у зман.
Незалежнае расейскае выданьне «Медиазона» паведаміла, што Скачыленка ў сваім заключным слове ў судзе назвала справу супраць яе «дзіўнай і недарэчнай». Паводле яе, сьледчы, які працаваў у пракуратуры, падаў у адстаўку, магчыма, сказаўшы аднаму з адвакатаў Скачыленкі, што «пайшоў працаваць у Сьледчы камітэт не дзеля таго, каб працаваць з такімі справамі».
Паведамляецца, што заля суду была запоўненая прыхільнікамі Скачыленкі, якія аплядавалі ёй падчас выступу і скандавалі яе імя ў калідоры пасьля вынясеньня прысуду.
Больш за паўтара года Скачыленка знаходзілася ў сьледчым ізалятары, змагаючыся з рознымі захворваньнямі, уключаючы праблемы з сэрцам, біпалярны разлад і цэліякію — хваробу, выкліканую імуннай рэакцыяй на ўжываньне глютену, заявілі яе адвааты.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
