Як паведаміла дзяржаўнаму агенцтву «Минск-новости» старшыня камітэту будаўніцтва і інвэстыцый Менгарвыканкаму Ірына Гонтарава, скончана раскансэрвацыя «Газпром-цэнтру». Пачаліся асноўныя будаўнічыя работы.
«У жніўні „Газпром“ прыступіў да раскансэрвацыі вышыннага будынку. Яна ўжо завершаная. Распрацаваны архітэктурны праект і ўжо пачалі непасрэдна будаўнічы мантаж. Паралельна ажыцьцяўляецца карэктаваньне праектнай дакумэнтацыі па астатніх будынках. Гэта значыць, зараз сілы сканцэнтраваныя на ўзьвядзеньні гмаху. Таксама заключана дадатковае пагадненьне да інвэстыцыйнай дамовы», — сказала яна.
Новы тэрмін здачы аб’екту — 2027 год.
Таксама ў Менску плянуюць аддаць пад паліклініку доўгабуд на вуліцы Маякоўскага. У будынак пасьля яго здачы пераедзе частка службаў 10-й паліклінікі, а таксама туды перанясуць мэдыцынскі цэнтар касмэталягічнай накіраванасьці, які знаходзіцца на вуліцы Максіма Багдановіча.
На месцы 2-й лякарні ў раёне Опэрнага тэатру будаўнікі пачалі ўжо трэцюю чаргу будаўніцтва шматфункцыянальнага комплексу. У яго будуць уваходзіць гатэлі і пешаходны мост на вуліцу Зыбіцкую.
