Затрыманьне ў Горадні
Сілавікі апублікавалі «пакаяльнае відэа» з гарадзенцам Сяргеем Чэкелем, дзе яго прымушаюць гаварыць пра сваё затрыманьне за распаўсюд экстрэмісцкіх матэрыялаў.
Таксама затрыманы нібыта браў удзел у акцыях пратэсту, піша @Grodno_grab.
У Гомлі затрымалі Васіля Палякова
Пра гэта на сваёй старонцы паведаміў прадстаўнік Офісу Ціханоўскай Анатоль Лябедзька.
«Выклікалі па позьве, у якой быў указаны артыкул па адміністрацыйнай справе. Праз пару гадзін прывезьлі ў кайданках дахаты. Правялі вобшук, забралі тэхніку, паперы. І, натуральна, Васіля», — напісаў ён.
Васіль — былы настаўнік гісторыі, звольнены з палітычных матываў. Шматразова ўдзельнічаў у розных палітычных кампаніях, пэўны час узначальваў Аб’яднаную грамадзянскую партыю.
Сілавікі зладзілі аблаву на дзяржаўным прадпрыемстве ў Шчучыне
У Шчучыне прайшлі масавыя затрыманьні супрацоўнікаў філіялу «Гроднааблаўтатранса» — аўтапарка № 12. «Хапун» доўжыўся два дні, паведамляе Hrodna.life.
Прычынай аблавы на дзяржаўным прадпрыемстве стала «распаўсюджваньне экстрэмісцкіх матэрыялаў» у інтэрнэце. Колькі ўсяго чалавек затрымалі, невядома. На мінулым тыдні работнікам аўтапарка распавялі пра Рэспубліканскі пералік экстрэмісцкіх матэрыялаў, адзначае выданьне.
На мінулым тыдні прапагандысты паведамілі аб «зачыстцы» ў Горадзенскім занальным інстытуце расьлінаводзтва Нацыянальнай акадэміі навук Беларусі, які таксама знаходзіцца ў Шчучыне. Некаторых супрацоўнікаў установы прыцягнулі да адказнасьці за тое ж «распаўсюджваньне экстрэмісцкіх матэрыялаў».
