У Літве, паводле стану на 1 верасьня, жывуць больш за 60 тысяч грамадзян Беларусі, паведамляе Delfi са спасылкай на справаздачу Дэпартамэнту па міграцыі МУС Літвы.
З пачатку 2023 году колькасьць беларусаў у Літве вырасла на 12 тысяч чалавек: на пачатак году ў краіне пражывала крыху больш за 48 тысяч беларусаў, а паводле зьвестак на 1 верасьня іх было больш за 60 тысяч. У справаздачы адзначаецца, што больш за ўсё за 2023 год у Літве вырасла менавіта беларуская дыяспара.
Грамадзяне Беларусі зьяўляюцца другой паводле колькасьці групай іншаземцаў, якія жывуць у Літве. На першым месцы — грамадзяне Ўкраіны (85,5 тысяч чалавек).
У Польшчы, паводле стану на красавік 2023 году, дазвол на часовае ці сталае знаходжаньне мелі каля 75,7 тысячы беларусаў.
