У рэзалюцыі Эўрапарлямэнту адзначаецца, што, «дазволіўшы неапраўданую агрэсіўную вайну Расеі супраць Украіны, рэжым Лукашэнкі стаў саўдзельнікам злачынстваў, што прадугледжвае адказнасьць за разбурэньні і шкоду, прычыненую Ўкраіне».
У сувязі з гэтым эўрадэпутаты лічаць, што спэцыяльны міжнародны трыбунал аб злачынствах Расеі супраць Украіны павінен мець юрысдыкцыю расьсьледаваць ня толькі ўчынкі Пуціна і расейскага палітычнага і вайсковага кіраўніцтва, але і беларускага кіраўніцтва. Эўрапарлямэнт заклікае інстытуты ЭЗ і дзяржавы-удзельніцы «прыняць меры для крымінальнага перасьледу беларускіх службовых асоб, якія саўдзельнічаюць у злачыннай агрэсіі, ваенных злачынствах, злачынствах супраць чалавечнасьці і генацыдзе супраць Украіны».
Эўрапарлямэнт лічыць рэжым Лукашэнкі датычным да гвалтоўнай дэпартацыі ўкраінскіх дзяцей і лічыць, што «дзеяньні самога Лукашэнкі і яго рэжыму таксама могуць быць кваліфікаваныя як злачынства супраць чалавечнасьці ў выглядзе «дэпартацыі або гвалтоўнага перамяшчэньня насельніцтва» паводле Рымскага статуту міжнароднага крымінальнага суду». Эўрапарлямэнт лічыць Лукашэнку такім жа адказным за гэтыя ваенныя злачынствы, як Уладзіміра Пуціна і Марыю Львову-Бялову, і таму заклікае Міжнародны крымінальны суд разгледзець пытаньне аб выдачы аналягічнага міжнароднага ордэра на арышт Лукашэнкі.
Эўрапарлямэнт таксама заклікае ЭЗ знайсьці законныя шляхі для канфіскацыі актываў беларускага кіраўніцтва і зьвязаных зь ім беларускіх арганізацый, якія ўдзельнічаюць у ваенных дзеяньнях Расеі, і, калі магчыма, выкарыстоўваць іх для аднаўленьня Ўкраіны.
Эўрадэпутаты таксама запатрабавалі спыніць у Беларусіі рэпрэсіі супраць іншадумцаў, «вызваліць усіх палітвязьняў і ўсіх адвольна затрыманых асоб, абвясьціць усеагульную амністыю для ўсіх арыштаваных па палітычных матывах ад 2020 году».
- Рэзалюцыя Эўрапарлямэнту аб Беларусі была прынятая 13 верасьня ў Страсбуры на падставе дакладу дэпутата ад Літвы Пятраса Аўштравічуса.
- Рэзалюцыі Эўрапарлямэнту маюць рэкамэндацыйны характар.
