Пры гэтым на папярэднім аналягічным саміце, які прайшоў у 2019 годзе ў Сочы, гаварылася пра больш за 20 мільярдаў даляраў сьпісанага доўгу. Такім чынам, за тры гады Расея даравала Афрыцы каля трох мільярдаў даляраў. Пуцін паабяцаў, што «па апошніх запытах афрыканскіх краінаў» Расея выдзеліць ім яшчэ больш за 90 мільёнаў долараў.
Таксама Пуцін заявіў, што па выніках 2022 года расейска-афрыканскі таваразварот дасягнуў 18 мільярдаў даляраў, а за першае паўгодзьдзе 2023 году вырас яшчэ на траціну.
Асобна Пуцін сказаў пра пастаўкі збожжа: у 2022 годзе Расея экспартавала ў Афрыку 11,5 мільёна тон збожжавых, а за адно паўгодзьдзе гэтага году — ужо амаль дзесяць мільёнаў тон.
На пленарным пасяджэньні форуму ў пятніцу быў падпісаны пакет дакумэнтаў аб супрацоўніцтве. Пуцін заявіў, што Расея і дзяржавы Афрыкі разам выступаюць за пабудову больш справядлівай архітэктуры ўладкаваньня сьвету, адзначыў неабходнасьць разам супрацьстаяць «распаўзаньню тэрарыстычнай пагрозы» і «спробам замены міжнароднага права так званым парадкам, заснаваным на правілах».
Кіраўнік Афрыканскага саюза Азалі Асумані 28 ліпеня заявіў, што прапановаў прэзыдэнта РФ па пастаўках збожжа ў Афрыку недастаткова.
У заключнай прамове на расейска-афрыканскім саміце ў Санкт-Пецярбургу Асумані таксама заявіў аб неабходнасьці спыненьня агню ў вайне, якую РФ вядзе супраць Украіны. Паводле яго слоў, Пуцін прадэманстраваў гатоўнасьць «да дыялёгу і пошуку рашэньня», і цяпер «трэба пераканаць» Украіну.
Раней Пуцін заявіў афрыканскім лідэрам, што Расея гатовая пастаўляць у Афрыку збожжа, частку — бясплатна, пасьля таго, як на мінулым тыдні адмовілася падоўжыць Чарнаморскую збожжавую ініцыятыву. Пагадненьне, заключанае ў мінулым годзе пры пасярэдніцтве ААН і Турэччыны, дазволіла Ўкраіне бясьпечна экспартаваць збожжа з партоў Чорнага мора, нягледзячы на вайну.
Сусьветная цана на збожжа рэзка вырасла пасьля таго, як Расея выйшла з пагадненьня і пасьля пачала бамбаваць партовую інфраструктуру Ўкраіны.
Расея хоча даць ад 25 да 50 тысячаў тон збожжа бясплатна ў бліжэйшыя тры-чатыры месяцы, заявіў Пуцін лідэрам афрыканскіх краінаў 27 ліпеня. Збожжа атрымаюць Зімбабвэ, Малі, Буркіна-Фасо, Самалі, Эрытрэя і Цэнтральна-Афрыканская Рэспубліка.
Асумані сказаў, што Пуцін «паказаў, што гатовы дапамагчы ў справе паставак збожжа», дадаўшы, што гэта важна, «але можа быць недастаткова». «Трэба дамагчыся спыненьня агню», — сказаў ён.
Пуцін заявіў афрыканскім лідэрам, што Кіеў адмаўляецца ад перамоваў. Расея даўно заяўляе, што адкрытая для перамоваў, але яны павінныя ўлічваць «новыя рэаліі» на месцы, гэта значыць заяўленую расейскімі ўладамі незаконную анэксію тэрыторый чатырох украінскіх абласьцей.
Прэзыдэнт Украіны Ўладзімір Зяленскі адхіліў ідэю спыненьня агню на расейскіх умовах, заявіўшы, што гэта пакіне прыкладна 20% тэрыторыі Ўкраіны пад кантролем Расеі і дасьць расейскім войскам час перагрупавацца пасьля 17 месяцаў шырокамаштабнай вайны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
