Долі замежных інвэстараў у расейскіх аддзяленьнях кампаній Danone і Carlsberg Group перадалі дзяржаве. Адпаведны ўказ падпісаў кіраўнік Расеі Ўладзімір Пуцін. Carlsberg Group у Расеі належаў знакаміты бровар «Балтика», піша газэта «КоммерсантЪ».
Абедзьве кампаніі рыхтаваліся прадаць мясцовы бізнэс. Пры гэтым у Carlsberg угода выйшла на фінальную стадыю, бо кампанія падпісала дамову зь неназваным пакупніком. Цяпер угоды прыпыненыя.
Раней былі паведамленьні, што францускі малочны холдынг Danone вядзе перамовы аб продажы з кампаніяй «Эконива». Пад угоду траплялі 13 заводаў, якія выпускаюць натуральнамалочныя прадукты, ёгурты і дэсэрты.
Расейскі дывізіён Danone традыцыйна быў лідэрам у выручцы сярод мясцовых кампаній: у 2022 годзе абарот склаў $ 1,3 млрд.
Carlsberg Group у канцы чэрвеня анансавала дамову з будучым уладальнікам расейскіх актываў і брэндаў. «Балтика», па зьвестках «Коммерсанта», у 2022 годзе выпусьціла 197,42 дал піва і піўных напояў. Кампанія займае другое месца ў рэйтынгу расейскіх півавараў.