У выведцы Міністэрства абароны Вялікай Брытаніі заявілі, што ў Данецкай вобласьці ўкраінскае войска змагло вярнуць частку тэрыторыі, якую Расея акупавала яшчэ ў 2014 годзе.
«Украінскія паветрана-дэсантныя сілы дасягнулі невялікага прасоўваньня на ўсход ад гораду Краснагораўкі недалёка ад гораду Данецку, якая знаходзіцца на старой лініі кантролю. Гэта адзін зь першых выпадкаў пасьля ўварваньня Расеі ў лютым 2022 году, калі ўкраінскія сілы, хутчэй за ўсё, вярнулі сабе тэрыторыю, акупаваную Расеяй з 2014 году», — адзначаецца ў паведамленьні вайсковай выведкі Вялікай Брытаніі.
У той жа час брытанскія выведнікі не ўдакладнілі, пра якія пазыцыі вядзецца. Горад Краснагораўка падпарадкоўваецца Мар’інскай грамадзе Данецкай вобласьці. Расея акупавала гэты населены пункт у пачатку 2023 году.
Генэральны штаб Узброеных сіл Украіны: эпіцэнтар баявых дзеяньняў — Данецкая вобласьць
Сьпікер Генэральнага штабу Ўзброеных сіл Украіны Аляксандар Штупун паведаміў, што за мінулыя содні ў Данецкай вобласьці на некалькіх кірунках адбылося 38 баявых сутыкненьняў сіл абароны Ўкраіны з расейскімі войскамі.
Паводле яго, расейцы спрабавалі наступаць пад Мар’інкай і Аўдзееўкай, але посьпеху не дасягнулі.
У выніку баёў украінскія сілы вызвалілі вёску Раўнопаль Данецкай вобласьці, якую расейцы захапілі ў сакавіку 2022 году.
Расея перад самітам NATO у Літве праводзіць вучэньні над Балтыкай
Міністэрства абароны Расеі ў сваім тэлеграм-канале паведамляе аб пасьпяховых дзеяньнях сваіх вайскоўцаў і нібыта зьнішчэньні ўкраінскай вайсковай тэхнікі і жывой сілы.
Апроч таго, Узброеныя сілы Расеі праводзяць лётна-тактычныя вучэньні ў небе над Балтыйскім морам. Паведамляецца, што зьнішчальная авіяцыя Балтыйскага флёту выканала стрэльбы па крылатых ракетах і самалётах умоўнага праціўніка.
«Асноўная мэта вучэньняў — праверка гатоўнасьці лётнага складу да выкананьня баявых і спэцыяліных задач па прызначэньні, а таксама практычнае адпрацоўваньне новых тактычных прыёмаў і спосабаў дзеяньняў з поўным выкарыстаньнем баявых магчымасьцяў авіяцыйнай тэхнікі», — адзначылі ў прэс-службы Мінабароны Расеі.
У літоўскай сталіцы Вільні 11-12 ліпеня адбудзецца саміт NATO. Прадугледжваецца, што на сустрэчы, апроч пытаньняў бясьпекі ў рэгіёне, абмяркуюць умовы ўступленьня Ўкраіны ў альянс. Як заявіў у эксклюзіўным інтэрвію Радыё Свабода прэзыдэнт Чэхіі генэрал Пэтр Павэл, Украіна можа атрымаць гарантыі, якія будуць «нечым сярэднім» паміж ранейшымі гарантыямі NATO Фінляндыі і Ізраілю.
Апроч таго, на саміце ў Вільні можа быць ухвалена рашэньне ў сувязі з плянамі Расеі разьмясьціць ядзерную зброю на тэрыторыі Беларусі. Папярэдне гэта абмяркуюць 16 чэрвеня, у другой палавіне дня, на пасяджэньні групы ядзернага плянаваньня. Пасяджэньне групы будзе закрытае для журналістаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
