У расейскім і ўкраінскім сэгмэнтах сацыяльных сетак зьявіліся паведамленьні аб баявых сутыкненьнях на мяжы паміж Украінай і Расеяй на тэрыторыі імаверна кантрольна-прапускнога пункту (КПП) у Грайваранаўскім раёне Белгародзкай вобласьці.
Як паведаміла расейская служба Радыё Свабода, на адным зь відэа на кантрольна-прапускны пункт нібыта заяжджае танк пад украінскім сьцягам.
На другім відэазапісе, які, магчыма, быў зроблены ў памяшканьні КПП, відаць цела забітага расейскага вайскоўца. Аўтэнтычнасьць відэа не пацьверджаная. Сьцьвярджаецца, што ў баявых сутыкненьнях з боку Ўкраіны ўдзельнічае так званы Расейскі добраахвотніцкі корпус.
Шэраг тэлеграм-каналаў паведамілі аб сутыкненьнях у раёне вёскі Дронаўкі.
Губэрнатар Белгародзкай вобласьці Вячаслаў Гладкоў абвінаваціў Украіну ў «інфармацыйнай атацы на вобласьць, якая заклікае да панікі». Ён пацьвердзіў факт абстрэлу Грайваранаўскага раёну, але паведаміў аб адсутнасьці параненых і загінулых. Улада, паводле яго, не паведамляла аб эвакуацыі насельніцтва.
Пазьней губэрнатар Белгародзкай вобласьці паведаміў, што нібыта «на тэрыторыю Грайваранскай акругі зайшла дывэрсійна-выведная група УСУ».
«Узброеныя сілы Расеяй разам з памежнай службай, Расгвардыяй і ФСБ ажыцьцяўляюць неабходныя захады для ліквідацыі праціўніка. Падрабязнасьці буду паведамляць», — напісаў Гудкоў у сваім тэлеграм-канале.
У Кіеве прызналі
Прадстаўнік Галоўнага ўпраўленьня выведкі Міністэрства абароны Ўкраіны Андрэй Юсаў пацьвердзіў інфармацыю аб баявых сутыкненьнях на мяжы Расеі і Ўкраіны.
«Так, сёньня Расейскі добраахвотніцкі корпус і легіён «Свабода Расеі», якія складаюцца з грамадзян Расеі, пачалі апэрацыю па вызваленьні гэтых тэрыторый Белгародчыны ад так званага рэжыму Пуціна і адцясьненьня праціўніка з мэтай стварэньня пэўнай паласы бясьпекі для абароны ўкраінскага цывільнага насельніцтва»,— паведаміў Андрэй Юсаў украінскаму тэлеканалу «Суспільне».
«Расейскі добраахвотніцкі корпус» (РДК) — узброенае фармаваньне, створанае правымі актывістамі, якія эмігравалі з Расеі і ваююць на баку Ўкраіны — перад гэтым паведамілі, што ягоныя байцы «ажыцьцявілі рэйд на расейскую тэрыторыю».
Корпус абнародаваў відэазапіс, на якім узброеныя людзі з сымболікай РДК пазуюць на тле таблічак з назвамі вёсак Бязьлюдаўка, Чуровічы і Любімаўка. Бязьлюдаўка знаходзіцца непадалёку ад Шабекіна ў Белгародзкай вобласьці, Чуровічы — у Бранскай, вёсак з назвай Любімаўка ў памежных рэгіёнах некалькі, у прыватнасьці ў Бранскай і Курскай абласьцях.
Аб сутыкненьнях у Белгародзкай вобласьці паведамілі Пуціну, яго рэакцыя невядомая
Як паведаміла расейская інфармацыйнае агенцтва РБК, Дзьмітрый Пяскоў, прэсавы сакратар расейскага прэзыдэнта, заявіў, што аб спробе «прарыву ўкраінскіх дывэрсантаў» у Белгародзкую вобласьць паведамілі Ўладзіміру Пуціну.
Паводле яго, «ідзе праца па выцясьненьні ўкраінскіх дывэрсантаў з расейскай тэрыторыі і зьнішчэньні гэтай дывэрсійнай групы, сіл і сродкаў на месцы дастаткова».
Дзьмітрый Пяскоў лічыць, што такім чынам украінскі бок хоча «мінімізаваць палітычны эфэкт ад страту Арцёмаўска». У Расеі Арцёмаўскам называюць горад Бахмут, які так называўся да свайго перайменаваньня ў межах дэкамунізацыі.
Расейская ўлада 2 сакавіка паведамляла пра ўкраінскую дывэрсійную групу, якая зайшла ў памежную з Украінай Бранскую вобласьць.
Пасьля поўнамаштабнага ўзброенага ўварваньня Расеі ва Ўкраіну прадстаўнікі ўладаў Белгародзкай, Бранскай і Курскай абласьцей рэгулярна заяўляюць пра артылерыйскія абстрэлы гэтых тэрыторый. Расея абвінавачвае ў гэтым Украіну. Украінскі бок абстрэлаў не камэнтуе.
У той жа час Расея інтэнсіўна абстрэльвае ўсё ўкраінскае памежжа — Чарнігаўскую, Сумскую і Харкаўскую вобласьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
