Губэрнатар Белгарадзкай вобласьці Вячаслаў Гладкоў паведаміў, што прачнуўся раніцай 27 красавіка а 3.35 «ад моцнага гуку, падобнага на выбух».
Калі меркаваць па ягоных публікацыях у тэлеграм-канале, цягам гадзіны ніводная экстраная служба не магла высьветліць прычыны гэтага гуку.
Праз паўгадзіны Вячаслаў Гладкоў дадаў, што, паводле папярэдняй інфармацыі, гарыць склад з боепрыпасамі ў раёне сяла Старая Нялідаўка.
Яшчэ празь дзьве гадзіны губэрнатар паведаміў, што «адкрытае гарэньне пажару» зьліквідавана», «пацярпелых сярод мірнага насельніцтва няма, разбурэньня жылых пабудоў і будынкаў таксама няма».
Гэта пяты інцыдэнт у Белгарадзкай вобласьці Расеі: 30 сакавіка, 1, 3 і 26 красавіка ў Белгарадзе адбылася сэрыя абстрэлаў ракетамі і выбухі на складах боепрыпасаў і нафтабазе.
Яшчэ два расейскія губэрнатары паведамілі пра выбухі ў сваіх рэгіёнах
Губэрнатар Курскай вобласьці Раман Старавойт таксама паведаміў, што ў ноч на 27 красавіка жыхары Курску чулі «воплескі» (так у Расеі называюць інцыдэнты з выбухамі або стрэламі. — РС). Паводле яго, спрацавала сыстэма супрацьпаветранай абароны (СПА). Ахвяр і разбурэньняў не было.
Аб гуках выбухаў у Курску паведамлялі і мясцовыя жыхары, як з цэнтру гораду, так і з ваколіц.
У Варонежы, які знаходзіцца прыкладна за 200 км ад мяжы з Украінай, адбылося два выбухі. Губэрнатар Варонескай вобласьці таксама паведаміў, што спрацавала СПА, якая нібыта зьбіла бесьпілётнік. Ён заявіў, што жыцьцям жыхароў рэгіёну «нічога не пагражае».
Масква абвінавачвае Кіеў у абстрэлах расейскіх рэгіёнаў
З пачатку расейскага ўварваньня ва Ўкраіну ўлады памежных рэгіёнаў Расеі рэгулярна паведамляюць аб абстрэлах, у якіх абвінавачваюць Кіеў.
Сёлета ў лютым у Растоўскай вобласьці паблізу з украінскай мяжой дзьве ракеты пацэлілі ў вайсковы аэрадром. Пазьней аналягічныя «абстрэлы» адбыліся ў Белгарадзскай, Растоўскай і Курскай абласьцях. 25 красавіка стала вядома б пажары на дзьвюх нафтабазах у Бранску.
Белгарадзкая вобласьць Расеі мяжуе з Харкаўскай і Сумскай абласьцямі Ўкраіны. Ад Бранску найбліжэйшы пункт у Сумскай вобласьці Ўкраіны знахрдзіцца за 123 кілямэтры. Растоўская вобласьць мяжуе з Данецкай і Луганскай абласьцямі Украіны.
З 11 красавіка Расея ўвяла ў памежных з Украінай абласьцях Расеі «жоўты» (высокі) узровень тэрарыстычнай пагрозы. Ён дзейнічае ў Курскай, Белгарадзкай, Бранскай абласьцях, двух раёнах Варонескай вобласьці, двух раёнах Краснадарскага краю, якія мяжуюць з Украінай па моры, а таксама на поўначы акупаванага Расеяй Крыму.
Украінскі бок пакуль не камэнтуе абвінавачаньняў у абстрэлах, але раней афіцыйны Кіеў папярэджваў, што Расея можа пачаць абстрэл сваёй тэрыторыі, каб «апраўдаць абстрэлы тэрыторыі Ўкраіны».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
