Палітвязьня Вадзіма Гурмана, які мае праблемы са зрокам, катуюць у горацкай калёніі
Паводле інфармацыі праваабаронцаў «Вясны», за апошнія некалькі месяцаў Вадзім Гурман адбыў як мінімум 35 дзён у ШЫЗА, 21 зь якіх — бесьперапынна. Апошнія 14 сутак яму прызначылі за адмову зьняцца ў відэа для камісіі па памілаваньні, падчас якога трэба было прызнаць сваю віну.
Ад пераахаладжэньня ў штрафным ізалятары ў Вадзіма нават здарылася брадыкардзія (стан сэрцавай цягліцы, калі частата яе скарачэньняў складае меней за 60 удараў у хвіліну).
Акрамя гэтага, паводле былога вязьня, супрацоўнікі калёніі некалькі дзён таму білі хлопца нагамі цягам шасьці гадзінаў, а потым халоднай вадой прыводзілі яго ў прытомнасьць, паведамляюць праваабаронцы.
Вадзім Гурман адбывае тры з паловай гады калёніі паводле двух крымінальных артыкулаў:
- за актыўныя дзеяньні, што груба парушаюць грамадзкі парадак (ч. 1 арт. 342),
- за пагрозы забойствам міліцыянтам Маладэчанскага РАУС (арт. 364).
Віны паводле артыкулу 364 ён не прызнаў.
Палітзьняволеную Алену Гнаўк выдалілі з судовага пасяджэньня
Пружанскую актывістку Алену Гнаўк, раней асуджаную да 3,5 года ў калёніі, цяпер судзяць паводле ч. 1 арт. 411 КК за «злоснае непадпарадкаваньне патрабаваньням адміністрацыі папраўчай установы», піша «Вясна».
Нядаўна яе зьмясьцілі ў ПКТ да 24 лютага, а перад гэтым часта адпраўлялі ў ШЫЗА. Таксама Алену пазбавілі амаль усіх перадач, званкоў, спатканьняў і скарацілі атаварку. У зьняволеньні ў жанчыны пагоршылася здароўе.
Суд Чыгуначнага раёна Гомля пачаў разгляд справы 11 красавіка на выязным пасяджэньні ў гомельскай калёніі. Справу разглядае судзьдзя Яраслаў Парэмскі.
Працяг суду адбыўся 18 красавіка, дапытвалі сьведак, якія блыталіся ў адказах, а саму палітзьняволеную выдалілі з залі суду. Суд абвясьціў перапынак да 28 красавіка.
