У Менскім гарадзкім судзе 7 красавіка распачынаецца завочны суд над Станіславам Лупаносавым. Працэс вядзе судзьдзя Алена Ананіч. Паводле раскладу на сайце Вярхоўнага суду, справу будуць разглядаць у закрытым рэжыме.
КДБ унёс Станіслава ў сьпіс асоб, якія маюць дачыненьне да тэрарыстычнай дзейнасьці. У Сьледчага камітэта на расьсьледаваньне гэтай справы ў парадку «спэцыяльнага вядзеньня» пайшло два тыдні.
Станіслаў Лупаносаў — падпалкоўнік ГУБАЗІКу, падчас службы супрацоўнічаў з ByPol. У канцы 2020-га ён выехаў з Беларусі. Па яго словах, апошняй кропляй для яго стала гібель Рамана Бандарэнкі ў лістападзе 2020 году.
Экс-апэратыўнік ГУБАЗіКу Лупаносаў у сьнежні 2020 году выехаў ва Ўкраіну. У Беларусі ён абвешчаны ў вышук. 14 траўня 2022 году Станіслава Лупаносава ўнесьлі ў сьпіс асобаў, датычных да «тэрарызму».
Лупаносаву інкрымінуюць 3 артыкулы Крымінальнага кодэксу:
- арт. 352 (неправамернае завалоданьне кампутарнай інфармацыяй);
- арт.356 (здрада дзяржаве);
- арт. 426 (перавышэньне ўлады альбо службовых паўнамоцтваў).
Цяпер за кратамі знаходзіцца брат Станіслава Міхаіл Лупаносаў. Супрацоўнікі МУС затрымалі Міхаіла 17 жніўня 2021 году паводле ч. 1 арт. 427 КК (прычыненьне маёмаснай страты без прыкметаў крадзяжу), арт. 380 КК (падробка, выраб, выкарыстаньне альбо збыт падробленых дакумэнтаў, штампаў, пячатак, блянкаў). Інкрымінаваныя яму падзеі адбываліся яшчэ ў 2016 годзе.
Міхаіл Лупаносаў да затрыманьня быў дырэктарам будаўнічай фірмы.
