Сам бізнэсовец сьцьвярджае, што на фота — загінуўшыя ва Ўкраіне байцы заснаванай ім «ПВК Вагнера». Па словах Прыгожына, усе адлюстраваныя на фота людзі загінулі за адзін дзень, 21 лютага, у баях пад горадам Бахмут. Ён абвінаваціў у іх сьмерці міністра абароны Расеі Сяргея Шайгу і кіраўніка Генштаба Валерыя Герасімава.
«Гэта хлопцы, якія загінулі з прычыны так званага снараднага голаду, — растлумачыў Прыгожын. — Вінаватыя ў гэтым тыя, хто павінны былі вырашыць пытаньне аб забесьпячэньні нас дастатковай колькасьцю боепрыпасаў. Фінальны подпіс павінен ставіцца альбо Герасімавым, альбо Шайгу. Ніводзін з іх не хоча прымаць рашэньне».
У якасьці доказу сваіх слоў Прыгожын апублікаваў заяўку з запытам неабходных боепрыпасаў на імя Валерыя Герасімава. «Неабходна 105 тысяч, а даюць 3 тысячы 600», — растлумачыў Прыгожын, назваўшы кіраўніцтва расейскай арміі «абарзелымі грамадзянамі».
У апошнія месяцы заснавальнік і спонсар «ПВК Вагнэра», блізкі да Уладзіміра Пуціна бізнэсовец Яўген Прыгожын, неаднаразова публічна крытыкаваў Мінабароны Расеі — у прыватнасьці за няслушную, на ягоную думку, тактыку вядзеньня вайны ва Ўкраіне і за адмовы выдаваць снарады яго байцам. На мінулым тыдні Прыгожын заявіў, што міністэрства хоча «зьнішчыць» «ПВК Вагнэра».
У ваенным ведамстве РФ доўга не камэнтавалі заявы Прыгожына, але напярэдадні выступілі са сьцьвярджэньнем, што " усе заяўкі на падачу боепрыпасаў для штурмавых падразьдзяленьняў выконваюцца ў найкарацейшыя тэрміны«, а словы аб іх недахопе зьяўляюцца «экзальтаванымі», «уносяць раскол» паміж падразьдзяленьнямі расейскай групоўкі ва Ўкраіне і «на карысьць ворагу». Прыгожын у адказ абвінаваціў Мінабароны ў хлусьні.
Шэраг карыстальнікаў тэлеграм-каналаў, якія падтрымліваюць вайну, у тым ліку некаторыя так званыя ваенкоры, у сераду паспрабавалі зладзіць сеткавы флэшмоб пад лёзунгам прадастаўленьня «ПВК Вагнэра» снарадаў. Мноства такіх аднатыпных камэнтароў зьявілася таксама ў трансьляцыі канцэрта ў Лужніках з удзелам Уладзіміра Пуціна.
- Прыватная ваенная кампанія «Вагнэр» — расейскае неафіцыйнае ваеннае падразьдзяленьне, якое прымае ўдзел у наземных апэрацыях у Сырыі, Афрыцы і ў вайне з Украінай. Байцоў кампаніі абвінавачваюць ва ўчыненьні шматлікіх ваенных злачынстваў, у тым ліку — у пазасудовых пакараньнях.
- Летам мінулага года, пасьля некалькіх ваенных паражэньняў расейскай арміі на тэрыторыі Украіны, «ЧВК Вагнэра» і асабіста Яўген Прыгожын пачалі вэрбаваць у свае шэрагі расейскіх зьняволеных і адпраўляць іх на вайну. Асуджаныя, якія згаджаюцца прыняць удзел у баявых дзеяньнях, павінны паўгады прабыць на перадавой, ім пад пагрозай расстрэлу забаронена адыходзіць і здавацца ў палон. Тым, хто праз паўгода застануцца жывымі, абяцаюць выхад на свабоду. Такім чынам у ПВК завэрбавалі дзясяткі тысяч байцоў. Аднак нядаўна СМІ паведамілі, што набор зьняволеных у «ПВК Вагнэра» спынены. Па дадзеных некаторых крыніц, зараз гэтым зоймецца Мінабароны.
- Афіцыйна, паводле расейскіх законаў, «ПВК Вагнэра» не існуе. У зводках Мінабароны атрады наймітаў гэтай структуры называюць «штурмавымі атрадамі добраахвотнікаў».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
